Альгірдас Буткявічус: Будаўніцтва АЭС у Беларусі нельга пачынаць
26- 20.08.2013, 11:28
- 24,327
Прэм'ер-міністр Літвы заклікаў спыніць падрыхтоўку да будаўніцтва АЭС у Астраўцы.
Згодна з патрабаваннямі Канвенцыі Эспоо (Канвенцыя аб ацэнцы ўздзеяння на навакольнае асяроддзе ў трансмежным кантэксце), будаўніцтва АЭС у Беларусі нельга пачынаць, заявіў Альгірдас Буткявічус.
«Калі казаць пра Астравецкую АЭС, варта прызнаць, што Камісія Эспоо ацаніла гэты праект негатыўна. Згодна з патрабаваннямі канвенцыі, будаўніцтва гэтага аб'екта не можа пачацца. Мы выдатна разумеем унутранае жаданне і мэту Беларусі распараджацца сваёй энергетычнай сістэмай, але пры рэалізацыі гэтага яна павінна строга выконваць патрабаванні Эспоо», - сказаў Буткявічус у аўторак у інтэрв'ю радыёстанцыі LRT.
Ён таксама раскрытыкаваў публічную прэзентацыю АЭС, якая была праведзеная ў Беларусі, перадае «Інтэрфакс».
«Усе ж гэтыя размовы, якія арганізуюцца ў Беларусі, я лічу пэўнай акцыяй Беларусі, жаданнем выканаць пэўную працу з грамадскасцю. Але калі глядзець на патрабаванні, якія вылучаюцца Канвенцыяй Эспоо, то Беларусь павінна зразумець, што яны павінны даслаць афіцыйнае запрашэнне, напрыклад, міністэрству навакольнага асяроддзя, якое каардынуе гэтыя пытанні, звязаныя з ацэнкай уплыву на навакольнае асяроддзе. А таксама павінна быць арганізаванае мерапрыемства з беларускага боку з запытам да Літвы, калі яны маглі б прыехаць у Літву і выкласці сваю пазіцыю», - растлумачыў прэм'ер.
Канвенцыя Эспоо ААН прадугледжвае, што публічныя спрэчкі з нагоды ацэнкі ўплыву на навакольнае асяроддзе могуць праводзіцца, калі эксперты зацікаўленых бакоў цалкам азнаёмяцца з адпаведнымі дакументамі.
Камітэт па рэалізацыі Канвенцыі Эспоо ААН у красавіку гэтага года абавязаў Беларусь працягнуць працэдуры ацэнкі ўздзеяння на навакольнае асяроддзе ў адпаведнасці з патрабаваннямі канвенцыі, каб адказаць на ўсе зададзеныя Літвой пытанні і ацаніць усе каментары.
Нагадаем, у суботу ў Беларусі адбылася прэзентацыя беларускай АЭС, якая была падвергнутая крытыцы з боку Вільні. Грамадзянам Літвы было прапанавана прыехаць у Беларусь па бясплатных візах, транспарт падаваў беларускі бок. Між тым, як паведаміла літоўская газета Lietuvos rytas, грамадзян, якія жадалі паехаць гэтымі аўтобусамі ў Астравец, аказалася вельмі мала. Паводле яе дадзеных, на гэта мерапрыемства з Літвы прыехалі сто чалавек. Па дадзеных газеты, такое мерапрыемства Менск абавязаны правесці для літоўцаў у адпаведнасці з Канвенцыяй Эспоо, якую ён ратыфікаваў.
У мінулы панядзелак кіраўнік МЗС Літвы заявіў, што Вільня чакае ад Менска адказаў аб бяспецы будучай АЭС.
Фота: Karolio Kavolėlio, Alfa.lt