Беларусы на фестывалі ў Эдынбургу: «Trash Cuisine» і «Вярніце цела»
4- 20.08.2013, 18:54
- 8,382
У брытанскім Эдынбургу падчас найбуйнейшага сусветнага тэатральнага фестывалю «Фрындж» Беларускі Свабодны тэатр правёў акцыю «Вярніце цела».
На фестываль у Эдынбургу, які праходзіць цягам жніўня, збіраецца блізу 1 млн гледачоў. Тут, у адной з галоўных тэатральных зал Эдынбурга - Pleasance Grand - граецца спектакль Беларускага Свабоднага тэатра «Trash Cuisine» («Пякельная кухня»), які дагэтуль трыумфальна прайшоў у Лондане на сцэне тэатра Young Vic.
У акцыі «Вярніце цела» ўзялі ўдзел акторы трупы Беларускага Свабоднага тэатра, супрацоўнікі лонданскага выдавецтва Oberon, адвакаты, прафесура Эдынбургскага ўніверсітэта і ўніверсітэта Falmouth, валанторы.
Акцыю асвятляе шатландская і ангельская прэса.
Кампанія «Вярніце цела» стартавала ў кастрычніку мінулага года, калі адбылася прэм'ера спектакля Беларускага Свабоднага тэатра «Trash Cuisine» у Амстэрдаме. Спектакль апавядае аб жахлівай практыцы ўжывання смяротнага пакарання ў Беларусі і ў свеце.
Кампанія «Вярніце цела» ўключае ў сябе шэраг патрабаванняў:
1. Скасаванне смяротнага пакарання ў Беларусі.
2. Заканчэнне расследавання спраў аб зніклых і вяртанне іхных целаў сваякам.
3. Вяртанне целаў пакараных смерцю родным і блізкім.
4. Вызваленне палітвязняў.