Дзіцячыя садкі перапоўненыя, працаваць няма каму

У Менску не хапае выхавацеляў у дашкольных установах.

Пра гэта заявіў 20 жніўня на форуме педагагічных работнікаў «Высокая якасць сталічнай адукацыі - інавацыйнаму развіццю горада» міністр адукацыі Сяргей Маскевіч, паведамляе БелТА.

Міністр адзначыў, што гэтая праблема часткова вырашаецца за кошт прыцягнення да працы педагогаў пенсіённага ўзросту і студэнтаў. «Аднак трэба прымаць больш актыўныя меры для арганізацыі прафарыентацыйнай работы, паляпшэння ўмоў працы і павышэння заработнай платы гэтай катэгорыі спецыялістаў», - сказаў ён. На 2013-2014 навучальны год заяўка камітэта па адукацыі Менгарвыканкама на педагагічныя кадры для ўстаноў дашкольнай адукацыі склала 457 чалавек.

Маецца і шэраг іншых праблемных пытанняў, падкрэсліў міністр. Звыш устаноўленых нарматываў укамплектавана 40,7% устаноў дашкольнай адукацыі (181 садок). Пры гэтым перавышэнне напаўняльнасці груп складае ад 20% да 40%.

Сяргей Маскевіч канстатаваў адставанне будаўніцтва дзіцячых садкоў ад планаў, прадугледжаных Праграмай развіцця сістэмы дашкольнай адукацыі ў Беларусі на 2009-2014 гады. Міністр адзначыў, што асноўнымі задачамі на новы навучальны год павінна стаць забеспячэнне крокавай даступнасці ўстаноў дашкольнай адукацыі ў мікрараёнах-новабудоўлях, а таксама ў раёнах кропкавай забудовы (Каменная Горка, Брылевічы і інш) за кошт будаўніцтва ў 2014 годзе 8 новых дзіцячых садкоў, адкрыцця ў дзяржаўных дзіцячых садках груп на платнай аснове, адкрыцця ўстаноў дашкольнай адукацыі прыватнай формы ўласнасці.