Новы рэкорд луканомікі: мінус $3,4 мільярда

За пяць месяцаў 2013 года сальда бягучага рахунку плацёжнага балансу склалася адмоўным у памеры $3368,5 млн.

Для параўнання, у мінулым годзе за той жа перыяд сальда было роўна $469 млн. У адносінах да ВУП дадзеныя паказчыкі склалі адпаведна мінус 12,8% і 2%, гаворыцца ў аналітычным аглядзе Нацыянальнага банка «Асноўныя тэндэнцыі ў эканоміцы і грашова-крэдытнай сферы Рэспублікі Беларусь» за студзень - чэрвень 2013 года.

Сальда першасных даходаў у студзені-траўні 2013 г. склалася адмоўным у памеры мінус $2242 млн., такім чынам пагоршылася ў 2,5 разы да студзеня-траўня 2012 г., што звязана з выплатамі даходаў прамым інвестарам. Па артыкуле другасных даходаў сальда таксама сфармавалася адмоўнае ў суме мінус $1420,3 млн. супраць мінус $1599,7 у студзені-траўні 2012 г.

Па фінансавым рахунку плацёжнага балансу чысты прыток капіталу склаў $2088,2 млн. (7,9% да ВУП) супраць чыстага адтоку ў памеры $976,6 млн. (мінус 4,1% да ВУП) у студзені-траўні 2012 г.

Прамыя інвестыцыі ў эканоміку краіны склалі 1 781,4 млн. даляраў ЗША, павялічыўшыся ў 2,3 разы ў параўнанні са студзенем-траўнем 2012 г. Рэінвеставанне даходаў склала 78,9% ад агульнага аб'ёму прамых інвестыцый.

Па аперацыях Урада і Нацыянальнага банка на чыстай аснове выплачана $578,4 млн., што абумоўлена пагашэннем Рэспублікай Беларусь знешніх абавязацельстваў, у тым ліку асноўнай пазыкі па крэдыце МВФ.

Прыцягненне капіталу ў банкаўскі сектар склала $844 млн., забяспечанае ў асноўным прыцягненнем кароткатэрміновых крэдытаў і пазык. Па нефінансавым сектары назіраўся прыток капіталу ў памеры каля $40 млн., абумоўлены галоўным чынам прыцягненнем крэдытаў і пазык.

У выніку, па выніках студзеня-траўня 2013 г. сфармавалася адмоўнае агульнае сальда плацёжнага балансу на ўзроўні $544 млн. (мінус 2,1% да ВУП), прафінансаванае прыцягненнем чацвёртага і пятага траншаў стабілізацыйнага крэдыту Антыкрызіснага фонду ў памеры $880 млн. У студзені-траўні 2012 года сальда плацёжнага балансу склала 203 млн. (0,9% да ВУП).