Уначы не будуць прадаваць спіртное таннейшае за 150 тысяч

Берасцейскі аблвыканкам абавязаў райвыканкамы абмежаваць продаж алкаголю коштам ніжэйшым за 1,5 базавай адзінкі.

І з панядзелка ва ўсіх гарадах, акрамя Ляхавічаў і Баранавічаў, алкаголь ноччу не прадаюць. Пасля 22.00 у крамах можна купіць толькі дарагія трункі: каньяк, віно, а таксама шампанскае ў сувенірным афармленні. Райвыканкамы Баранавічаў і Ляхавічаў пакуль ўзгадняюць пастанову.

- Так, менавіта праваахоўныя органы і выступілі ініцыятарамі забароны, - распавялі «Комсомольской правде в Беларуси» ў прэс-службе УУС Берасцейскага аблвыканкама. - Мы прааналізавалі, што менавіта ў гэты час адбываецца больш за ўсё злачынстваў. Людзі звычайна ідуць у бары, там выпіваюць. А далей у так званыя начнікі ідуць за дадатковай порцыяй, потым яшчэ і яшчэ. Увогуле, не за хлебам туды а трэцяй ночы ідуць. І вось ужо сваркі, бойкі, панажоўшчына і г.д. Кожнае чацвёртае злачынства ў вобласці ўчыненае ў стане алкагольнага ап'янення. У нецвярозым стане знаходзілася амаль палова загінуўшых на пажарах. З віны п'яных кіроўцаў у гэтым годзе загінулі сем чалавек.

- А вы не думаеце, што людзі стануць проста больш купляць самагонку на нелегальных пунктах?

- Мы прааналізавалі сітуацыю. І ўбачылі, што за сем месяцаў гэтага года ўжо выяўлена 990 выпадкаў незаконнага продажу алкаголю. У мінулым годзе было ўдвая менш, - адзначылі ў прэс-службе. - Гэта значыць, нягледзячы на свабодны продаж алкаголю, нелегальна ўсё роўна гандлююць. Таму тут няма ўзаемасувязі. Але нават калі гэта і будзе так, нашыя супрацоўнікі гатовыя рэагаваць.

У Берасцейскай вобласці да панядзелка дзень і ноч спіртным гандлявалі 35 крам. Усяго алкаголь прадаюць у 2472 гандлёвых аб'ектах.