Настаўнікаў адправілі на «бітву за ўраджай»

Педагогі і навучэнцы будуць дапамагаць аграрыям Менскай вобласці прыбіраць ураджай.

Пра гэта паведаміла прэс-сакратар упраўлення адукацыі Менаблвыканкама Алена Паплаўская, перадае БелТА.

«Дапамога арганізаваная ў рамках акцыі «Прыбяром ўраджай да зярнятка», якая стала традыцыйнай для Менскай вобласці. У ёй задзейнічаныя больш за 200 школьнікаў. Дапамагаюць прыбіраць ураджай і хлопцы ў складзе лагераў працы і адпачынку, а таксама навучэнцы ПТВ і ССНУ», - сказала яна.

У сталічнай вобласці ў 16 лагерах працы і адпачынку занятыя, па словах Алены Паплаўскай, 248 навучэнцаў. Яны працуюць на зернескладах, займаюцца добраўпарадкаваннем тэрыторый. За сваю працу яны атрымаюць 500 тысяч рублёў. Найбольш актыўна развярнулі працу лагеры ў Валожынскім, Лагойскім, Маладзечанскім, Пухавіцкім, Салігорскім, Смалявіцкім, Старадарожскім і Стаўбцоўскім раёнах.

Па стане на 6 жніўня гаспадаркі Менскай вобласці прыбралі 249,9 тыс. га збожжавых культур, або 52% запланаваных плошчаў. Намалочана 930,5 тыс. т збожжа пры сярэдняй ураджайнасці 35 ц/га (у мінулым годзе на гэтую дату сярэдняя ўраджайнасць склала 41,7 ц/га). Па ўраджайнасці лідзіруюць Нясвіжскі (убрана 50% плошчаў, ураджайнасць 60,2 ц/га), Клецкі (51% і 49,1 ц/га), Менскі (28% і 47,1 ц/га), па валавому збору збожжа - Слуцкі (107,7 тыс. т), Капыльскі (81,1 тыс. т) і Нясвіжскі (67,8 тыс. т) раёны.