«Мігранцкая ліхаманка» ў Маскве: тысяча затрыманых, чысткі ў паліцыі

Зачыстка нелегалаў на рынках расейскай сталіцы прывяла да звальненняў у праваахоўных органах.

У карупцыі і «здрадзе інтарэсаў службы» выкрылі двух афіцэраў МУС, а таксама высокапастаўленага супрацоўніка маскоўскага ўпраўлення Федэральнай міграцыйнай службы (ФМС), паведамляе прэс-служба маскоўскай паліцыі.

Афіцэры ўжо звольненыя «па адмоўных матывах»: гэта намеснік начальніка АМВД па раёне Гальянава і намеснік начальніка па аператыўнай рабоце АМВД раёна Ізмайлава. Іх «калегам» з ФМС апынуўся начальнік аддзела гэтай службы па Усходняй адміністрацыйнай акрузе сталіцы, які ўзначальвае аддзяленне праверачных мерапрыемстваў. Прозвішчы ў паведамленні не называюцца.

Факты здзейсненых імі злачынстваў былі выкрытыя ў рамках аператыўнай распрацоўкі членаў злачыннай супольнасці, якія арганізавалі нелегальную міграцыю і выкарыстанне на падпольнай вытворчасці ў Маскве рабскай працы замежнікаў, у асноўным грамадзян В'етнама. Вынікі перададзеныя ў падраздзяленне Галоўнага следчага ўпраўлення Следчага камітэта Расеі па Маскве для прыняцця працэсуальнага рашэння, піша NEWSru.com.

Па дадзеных паліцыянтаў, АЗГ з шасці чалавек - выхадцаў з Ірака, Сірыі, В'етнама і Азербайджана - забяспечыла незаконны ўезд у Расею і знаходжанне на падкантрольных ёй аб'ектах больш 700 замежнікаў, пераважна азіятаў, якія не валодаюць расейскай мовай. Гэтых людзей прымушалі жыць і працаваць на падпольных швейных цэхах у антысанітарных умовах. Там знаходзіліся і цяжарныя жанчыны, і грудныя дзеці.

Па меры паступлення мігрантаў на аб'екты члены АЗГ канфіскоўвалі ў іх дакументы, выключыўшы магчымасць вяртання назад або рэалізацыі грамадзянскіх правоў на тэрыторыі Расеі. Тым самым іх пазбавілі магчымасці адмовіцца ад працы, распавядае прэс-служба. Прыезджых ахоўвалі, не дапушчаючы іх кантактаў з уладамі і жыхарамі Масквы. Іх забяспечвалі прадуктамі харчавання, «фактычна ажыццяўляючы паўнамоцтвы ў дачыненні да іх, уласцівыя праву ўласнасці».

Выяўленых нелегалаў, нагадаем, перасялілі ў намётавы лагер, прычым гэта выклікала міжнародны скандал: В'етнам абурыўся «жахлівымі ўмовамі», гнеўнай рэакцыі сталі чакаць і ад суседзяў Расеі - Таджыкістана, Узбекістана і Кыргызстана.

Пасля крытыкі ў лагер замест ненавіснай в'етнамцам грэчкі завезлі рыс, а таксама вентылятары. А потым і зусім пачалі рассяляць намётавы гарадок, перамяшчаючы мігрантаў у стацыянарныя ізалятары часовага ўтрымання.

Зрэшты, гэтым замежнікі таксама засталіся незадаволеныя і папрасіліся назад, так што за мінулыя суткі колькасць насельнікаў лагера зноў павялічылася - да 586 чалавек, паведамілі ў сераду ў прэс-службе сталічнага ГУ МУС. Раней паведамлялася, што ў лагеры засталіся 388 чалавек.

Затрыманні на рынках Масквы працягваюцца

Тым часам затрыманні арганізатараў нелегальнай міграцыі працягваюцца. За мінулыя суткі ў розных раёнах расейскай сталіцы затрыманыя сем чалавек, якія за грошы дапамагалі незаконнаму ўладкаванню прыезджых, у тым ліку ў падвалах жылых дамоў і складскіх памяшканняў. Па ўсіх фактах распачатыя крымінальныя справы аб арганізацыі незаконнай міграцыі. Максімальнае пакаранне па ёй - турма тэрмінам да сямі гадоў.

Не спыняюцца і рэйды на рынках. На паўднёвым усходзе Масквы для праверкі затрыманыя і дастаўленыя ў аддзелы паліцыі больш тысячы чалавек. Аператыўныя мерапрыемствы праходзяць на рынку «Садавод», у іх задзейнічана каля 400 праваахоўнікаў, перадае «Інтэрфакс».

Тым часам у Маскве і Пецярбургу набіраюць папулярнасць акцыі рускіх праварадыкальных арганізацый па запалохванню прыезджых рынкавых гандляроў.

Нелегальных мігрантаў будуць высылаць у выпадку двух грубых парушэнняў адміністрацыйнага заканадаўства.

«Гэта азначае: два сур'ёзныя парушэнні правілаў дарожнага руху, два парушэнні працоўнага заканадаўства, нейкае хуліганства і г. д. - і ўсё, ты больш не заедзеш у краіну. Мне здаецца, гэта больш эфектыўныя меры, чым бегаць і лавіць незаконных мігрантаў па будоўлях, хоць і гэта трэба рабіць», - сказаў часова выконваючы абавязкі мэра Масквы Сяргей Сабянін у інтэрв'ю газеце «Ведомости».

Пры гэтым ён паабяцаў, што ў рамках «прафілактычных мерапрыемстваў» будуць правярацца і рынкі, і будоўлі, і аб'екты камунальнай гаспадаркі, і «гумовыя» кватэры.