Менчукі спрабавалі вырашыць дарожны канфлікт з дапамогай бітаў

Нядбайны паркоўшчык у адказ на заўвагу дастаў з багажніка свайго аўтамабіля біту.

Канфлікт здарыўся ўчора каля ўнівермага «Радзівілаўскі» ў Менску.

Пра яго распавёў адзін з удзельнікаў - кіроўца грузавіка, які вёз прадукты ў краму, піша onliner.by.

Паводле яго слоў, спрэчка, якая ледзь не скончылася бойкай з ужываннем біты, узнікла на пустым месцы. Кіроўца легкавіка не даў грузавіку з прадуктамі праехаць да крамы, гэта значыць перашкаджаў выкананню прафесійных абавязкаў. Інцыдэнт удалося вырашыць толькі супрацоўнікам ДАІ.

«Учора, каля 17:00, я прыехаў на грузавой машыне на разгрузку ва ўнівермаг «Радзівілаўскі» па вул. Астрашыцкай, 3, - распавёў падрабязнасці мужчына. - Але я не змог праехаць да крамы, бо дарогу часткова перагарадзіў «немалады» Ford Sierra. Праехаць да рампы магчымасць была, але для гэтага трэба было заязджаць на бардзюр, ад чаго прадукты могуць упасці. Каля легкавіка стаялі два хлопцы 20-22 гадоў. Аднаго з іх я папрасіў (без грубіянстваў) прыбраць машыну са шляху на свабодную паркоўку, якая знаходзіцца побач. Малады чалавек адрэагаваў агрэсіўна, сказаў, маўляў, не буду ад'язджаць, сам аб'едзеш. На гэта я адказаў, што ў такім выпадку выклічу ДАІ. Гэта раззлавала яго яшчэ больш».

Кіроўца Ford Sierra падышоў да грузавіка і заявіў, што будзе стаяць там, дзе захоча. Усё гэта суправаджалася нецэнзурнай лаянкай.

«Ён, не саромеючыся ў выразах, сказаў прыкладна наступнае: «Калі не зваліш адсюль, я дастану біту і разаб'ю табе галаву». Трэба заўважыць, што другі хлопец назіраў за гэтым і пасміхаўся. Я адказаў: «Усё. Выклікаю міліцыю». Хлопец пабег да багажніка свайго аўтамабіля з крыкам: «Табе канец». Я стаў аб'язджаць Ford па бардзюры. Як і варта было чакаць, тавар пападаў. Я паглядзеў у бакавое люстэрка і ўбачыў, што малады чалавек сапраўды дастаў бейсбольную біту і бяжыць за маёй машынай. Прабег ён 5-6 метраў і спыніўся, пачуўшы крык работніц крамы. Адна з іх пабегла яму насустрач і стала ўключаць камеру на мабільным тэлефоне, каб зафіксаваць тое, што адбываецца. Хлопца гэта, відаць, напалохала, і ён павольна вярнуўся да Ford, пры гэтым працягваў мацюкацца», - распавядае кіроўца грузавіка.

Пасля гэтага ён выйшаў з машыны і накіраваўся да хлопца. Там жа стаяла работніца крамы і таварыш хулігана. Паралельна кіроўца грузавіка патэлефанаваў у міліцыю, аднак маладога чалавека гэта раззлавала яшчэ больш.

«Мы спрабавалі супакоіць яго довадамі. Але ён літаральна рыкаў на нас ад злосці і ад таго, што чуў, як я размаўляю з супрацоўнікамі міліцыі. Праз 3 хвіліны прыехала ДАІ. На парушальніка быў складзены пратакол за паркоўку ў неўстаноўленым месцы. Работніцы крамы пажадалі быць сведкамі. Праз пару гадзін я прыехаў у аддзяленне міліцыі і напісаў заяву аб тым, што здарылася. У ёй я адзначыў, што прашу прыцягнуць хлопца да ўстаноўленай законам адказнасці, канкрэтны артыкул крымінальнага або адміністрацыйнага кодэкса я не паказваў. Сам я займаўся ўсходнімі адзінаборствамі, барацьбой і цалкам мог бы даць адпор, але вырашыў урэгуляваць канфлікт законным метадам. Мяне зачапіў не сам факт таго, што адбылося, а жорсткая агрэсія і грубасць моладзі. Бо ніхто не грубіў ім, я проста папрасіў іх ад'ехаць», - распавёў ён.

Адзначым, што крыху пазней з'явілася іншая версія таго, што адбылося. Відавочцы дадзенага канфлікту сцвярджаюць, што ўсё адбывалася некалькі інакш.

«Хлопцы пад'ехалі на паркоўку «Радзівілаўскага». Яны сталі не па правілах, але дарогу нікому не перагароджвалі. Пры мне два грузавіка праехалі не наязджаючы ні на якія бардзюры. Кіроўца грузавіка пад'ехаў і падпёр «форд» хлопцаў, і пачаў размахваць рукамі і абражаць іх з кабіны. Адзін з хлопцаў сказаў: «Здай назад, я прыбяру машыну, на што кіроўца грузавіка зноў пачаў мацюкацца, - піша адзін з іх. - Хлопец падышоў да кабіны і яшчэ раз яму сказаў, каб той ад'ехаў трохі назад. Кіроўца грузавіка паслаў яго на тры літары, сказаў, што зараз выйдзе і пераламае ногі абодвум хлопцам і рэзка націснуў на газ».

Відавочца здарэння адзначыў, што калі б хлопец своечасова не адскочыў, то грузавік наехаў б на яго. Пасля гэтага, паводле яго слоў, малады чалавек дастаў з багажніка біту, але калі ўбачыў, што кіроўца грузавіка нічога не збіраецца рабіць, пайшоў назад да сваёй машыны.