Мінэканомікі знайшло новы спосаб «барацьбы» з інфляцыяй

Інфляцыю вырашылі «знізіць» шляхам вынясення тарыфаў за ЖКГ за межы разлічанага органамі статыстыкі індэкса спажывецкіх коштаў.

Такую ідэю агучыў першы намеснік дырэктара Навукова-даследчага эканамічнага інстытута (НДЭІ) Мінэканомікі Віктар Пінігін у артыкуле, апублікаваным у «Экономическом бюллетене», што выдаецца інстытутам, піша БелаПАН.

«Коштавая палітыка ў прагнозным перыядзе (2014-2016 гады) павінна забяспечваць далейшае зніжэнне ўзроўню інфляцыі пры адначасовай ліквідацыі структурных коштавых дэфармацый. Знішчэнне наяўных структурных дыспрапорцый у сферы коштаўтварэння прадугледжвае перш за ўсё пераход да тарыфнай палітыкі ў ЖКГ і на транспарце, якая забяспечвае больш поўнае пакрыццё насельніцтвам затрат у гэтай сферы», - адзначае Пінігін. Аднак, працягвае ён, дасягненне мэтаў праграмы сацыяльна-эканамічнага развіцця - 2015 па ўзроўню такога пакрыцця азначае, што «мэтавы паказчык інфляцыі (ІПЦ) не будзе дасягнуты».

Тым не менш, мяркуе першы намеснік дырэктара НДЭІ Мінэканомікі, павышаць узровень кампенсацыі насельніцтвам кошту жыллёва-камунальных паслуг шляхам павышэння тарыфаў неабходна.

«Разам з тым сітуацыя патрабуе рэалізацыі названых рашэнняў з адначасовым прыняццем адпаведных мер па кампенсацыі магчымых страт для насельніцтва шляхам перадачы сродкаў бюджэту, якія накіроўваліся на датацыі ў гэтыя сферы, непасрэдна карыстальнікам транспартных і жыллёва-камунальных паслуг», - лічыць Пінігін.

Пры гэтым, дадае ён, «уяўляецца магчымым вынесці змену дадзеных тарыфаў за межы разлічанага органамі статыстыкі індэкса спажывецкіх коштаў, які ўжываецца ў якасці паказчыка інфляцыі». «Паколькі інфляцыя з'яўляецца адлюстраваннем змены пакупніцкай здольнасці грошай, перадача іх з бюджэту насельніцтву для аплаты названых паслуг не мяняе сукупнай пакупніцкай здольнасці грашовых сродкаў, якія функцыянуюць у эканоміцы, змяняючы толькі суб'екты, якія будуць ажыццяўляць гэтыя плацяжы», - мяркуе Пінігін.

Нагадаем, зацверджаная Праграма сацыяльна-эканамічнага развіцця на 2011-2015 гады прадугледжвае, што ўзровень кампенсацыі насельніцтвам затрат на паслугі жыллёва-камунальнай гаспадаркі ў 2015 годзе складзе не менш за 60%.

Разам з тым міністр жыллёва-камунальнай гаспадаркі Андрэй Шорац у ліпені гэтага года падчас прамой лініі ў газеце «Рэспублiка» паведаміў, што насельніцтва ў цяперашні час пакрывае 16,3% кошту паслуг, што аказваюцца жыллёва-камунальнымі арганізацыямі.

Раней Мінфін паведамляў, што па ўсім комплексе жыллёва-камунальных паслуг, уключаючы паслугі энергетыкаў (цеплазабеспячэнне ад цеплакрыніц ДВА «Белэнерга», а таксама газа-і электразабеспячэнне), насельніцтва ў 2012 годзе кампенсавала каля 22% ад выдаткаў.