Жыхар Магілёва: Кандуктар парвала грошы і кінула мне ў твар

Дзіўны выпадак адбыўся ў адным з аўтобусаў Магілёва.

Канфлікты ў грамадскім транспарце здараюцца рэгулярна. Пра адзін з іх, досыць дзіўны, паведаміў чытач onliner.by з Магілёва Зміцер. Па словах маладога чалавека, яго прылюдна і бесцырымонна абразілі ў аўтобусе.

«6 жніўня 2013 года ў аўтобусе па маршруце №40 (дзяржнумар МС 2792) пры аплаце мною праезду мне нахаміла і абразіла мяне сваімі паводзінамі ў прысутнасці пасажыраў кандуктар, - напісаў у рэдакцыю Зміцер. - Я падаў да аплаты 1700 рублёў, сярод якіх была купюра ў 100 рублёў. Кандуктар С. палічыла яе бруднай і сказала, што купюру не прыме. Я спакойна адказаў, што ёсць заканадаўчыя нормы прызнання купюр Нацбанка РБ неплацежаздольнымі, а гэтая купюра плацежаздольная, а значыць, я разлічыўся за праезд у поўным памеры. У адказ кандуктар пачала павышаць на мяне голас і крычаць. На якой падставе работнікам сферы паслуг гэта дазваляецца? Затым С. парвала 100-рублёвую купюру і кінула ў мяне парваныя часткі, чым прынізіла перад вачыма старонніх людзей».

Адпаведную скаргу Зміцер пакінуў у аўтапарку: «Напісаў, што патрабую неадкладнага пакарання кандуктара за гэты ўчынак, бо лічу гэта абуральным фактам хамства і нявартымі паводзінамі. І яшчэ адзін «штрых»: талончык яна ўсё-такі мне дала, але не ў рукі…»

Па словах Змітра, пра гэты выпадак ён распавёў не таму, што хоча «крыві»: проста надакучыла мірыцца з укаранёнымі стэрэатыпамі.

«Лічу, мы як маладое пакаленне (так бы мовіць, якое вырасла на стыку стагоддзяў) не павінны пакідаць гэты саўдэпаўскі вобраз мыслення ў нашай паўсядзённай культуры, - разважае чытач. - Хацелася б прыцягнуць увагу грамадскасці і чыноўнікаў да гэтага (і не толькі) выпадку хамства з боку работнікаў сферы паслуг. Падчас паходу ў аўтобусны парк я жахнуўся пасля хуткага прагляду суседніх скаргаў: «Хто нас возіць у грамадскім транспарце, хто адказвае за наша жыццё і здароўе падчас руху па дарогах горада?» З цяжкасцю ўяўляю падобную сітуацыю ў якой-небудзь еўрапейскай краіне. Няўжо немагчыма аўтаматызаваць кантроль і продаж квіткоў у грамадскім транспарце?»

У аўтапарку №1 нам распавялі, што скаргу яны зафіксавалі, правядуць унутранае расследаванне, апытаюць кандуктара і ўстановяць ісціну. Спецыялісты паабяцалі неўзабаве распавесці пра прынятыя меры.