Амерыканец выжыў пасля ўкусу змяі, удару маланкі і атакі малпаў

Жыхару Фларыды цудам удавалася выйсці жывым з самых экстрэмальных сітуацый.

Апошні інцыдэнт здарыўся нядаўна. 40-гадовы Эрык Норы (на фота), уладальнік кампаніі па вытворчасці карабельнай фарбы, вяртаўся з падводнага палявання на марскога акуня, калі яму ў левую нагу ўчапілася акула, піша The New York Daily News.

«Я адчуў жахлівую хватку на сваёй назе, павярнуўся і ўбачыў, што акула, трасучы галавой, адрывае кавалак плоці», - распавёў ён.

Мужчына здолеў адбіцца ад марской драпежніцы і дабрацца да водмелі, дзе зрабіў жгут з гумовых цяжаў свайго арбалета. Падмогу выклікала яго дачка па радыё, піша NEWSru.com.

На беразе яму аказалі першую неабходную дапамогу, пасля чаго на верталёце перавезлі ў шпіталь Маямі, дзе зрабілі аперацыю. Сёння, аднак, яму патрэбная новая - па перасадцы тканін. Іх возьмуць са сцягна і «ўжывяць» у ікраножную цягліцу. Аднаўленне зойме некалькі месяцаў.

Норы ўжо пакрысе пачынае хадзіць. Ён рады, што жывы і дзякуе вышэйшыя сілы, лічачы, што толькі яны ў самы небяспечны момант дапамаглі яму выратавацца ад немінучай гібелі. Тым больш, што падобныя «смяротныя сутычкі з прыродай» амерыканцу давялося перажыць не раз.

У 10 гадоў Эрык быў збіты з ног, на шчасце, без траўмаў, калі ў дуб, пад якім ён стаяў, трапіла маланка. Праз тры гады яго ўкусіла грымучая змяя, і ён ледзь не страціў нагу. На шчасце, двухтыднёвае інтэнсіўнае лячэнне дало добры вынік.

Яшчэ два разы на яго нападалі малпы: у Бразіліі прымат ударыў яго па галаве, а ў Гандурасе, калі жонка пажартавала і замкнула яго ў клетцы са злоснай малпай, тая скокнула на яго, укусіла і ўдарыла яго ж ключамі. Пры гэтым жонка толькі хіхікала і шчоўкала фотаапаратам. Абодва інцыдэнты, зрэшты, былі не небяспечнымі.

Газета, апісваючы гэтыя прыгоды, губляецца, кім правільней лічыць Эрыка Норы - рэдкім няўдачнікам ці ж незвычайным шчасліўцам.