«Менск» упершыню выйшаў у плэй-оф Лігі Еўропы
9- 9.08.2013, 7:38
- 16,662
ФК «Менск» абыграў у матчы ў адказ трэцяга кваліфікацыйнага раўнда Лігі Еўропы шатландскі «Сэнт-Джонстан».
Такім чынам беларусы выйшлі ў стадыю плэй-оф турніру. Наймацнейшы ў супрацьстаянні двух клубаў быў вызначаны ў серыі пасляматчавых пенальці, піша «Інтэрфакс».
«Сэнт-Джонстан» (Шатландыя) - «Менск» (Беларусь) - 0:1 (па пенальці 2:3).
Гол: 0:1 - Рніч, 75.
Пенальці ў ФК «Менск» рэалізавалі Васілюк, Разін, Свярчынскі. Не рэалізавалі - Кібук, Казека.
Нагадаем, тыднем раней на стадыёне «Нёман» у Гродна «Менск» саступіў «Сэнт-Джонстану» з лікам 0:1. Таму ў паядынку ў адказ беларусам неабходная была перамога. Задача для дэбютантаў Лігі Еўропы была няпростай, тым больш, што «Сэнт-Джонстан» лічыцца «хатняй» камандай, а ў еўракубках шатландскі клуб не прайграваў на сваім полі 42 гады.
Пры падтрымцы 8500 гледачоў, якія прыйшлі пабалець за сваю каманду на стадыён «Макдайармід Парк» у Перце, «Сэнт-Джонстан» гуляў больш актыўна, чым госці з Беларусі, аднак аж да сярэдзіны другога тайма лік заставаўся нічыйным. А на 75-й хвіліне менчукам удалася контратака, завяршыў якую пасля паса Букаткіна Рніч.
Калі вялі ў ліку, «Менск» зайграў больш упэўнена, у той час як шатландскія футбалісты занерваваліся. Асноўны час матчу скончыўся з лікам 1:0 на карысць менчукоў. У дадатковы час галоў забіта не было і лёс пуцёўкі ў плэй-оф Лігі Еўропы вырашаўся ў серыі пасляматчавых пенальці.
У латарэі адзінаццаціметровых выдатна праявілі сябе брамнікі абедзвюх каманд, аднак больш удачлівымі аказаўся галкіпер «Менска» Уладзімір Бушма, які парыраваў удары Макея і Макліна і прымусіў памыліцца Крэга, які прабіў у штангу. Брамнік «Сэнт-Джонстана», у сваю чаргу, адбіў удары Кібука і Казекі. У выніку перамога дасталася камандзе са сталіцы Беларусі.
Нагадаем, учора іншы беларускі футбольны клуб - менскае «Дынама» - не здолеў распячатаць браму турэцкага «Трабзанспора» ў паядынку ў адказ, які завяршыўся нулявой нічыёй. У выніку каманда Юрыя Чыжа завяршыла выступленні ў еўракубках - у першым матчы менчукі прайгралі туркам ў Брэсце з лікам 0:1.
Такім чынам, ФК «Менск» застаўся адзіным беларускім клубам, які працягвае выступленні ў еўракубках.