У Беларусі з'явілася першае лячэбнае марозіва
28- 9.08.2013, 11:26
- 22,091
Яно нармалізуе мікрафлору кішачніка, умацоўвае імунітэт і стымулюе абмен рэчываў. Ды да таго ж яшчэ і не спрыяе паўнаце.
Нядаўна незвычайны для краіны прадукт - біямарозіва - пратэставалі ў Рэспубліканскім навукова-практычным цэнтры пульманалогіі і фтызіятрыі. У эксперыменце ўдзельнічалі 45 чалавек. 15 з іх увайшлі ў кантрольную групу і не атрымлівалі марозіва, астатнія 30 (дарэчы, сярод іх былі і дзеці) на працягу трох тыдняў штодня з'ядалі па порцыі халоднай прысмакі, піша «Рэспублiка».
«Вынікі даследавання паказалі, што ў 50% дзяцей і 95% дарослых, якія елі біямарозіва, павялічылася ўтрыманне біфіда-і лактабактэрый, - распавядае Зміцер Катовіч, урач-спецыяліст Рэспубліканскага навукова-практычнага цэнтра пульманалогіі і фтызіятрыі. - А гэта спрыяе прафілактыцы дысбіятычных парушэнняў арганізма».
Пакуль купіць незвычайнае марозіва можна ў аптэках, фітнес-цэнтрах і аддзелах спецыялізаванага харчавання Менска. Вага аднаго ражка - 45 грамаў. Няшмат, але, па дадзеных спецыялістаў, менавіта такая порцыя змяшчае сутачную норму біфіда-і лактабактэрый, патрэбных арганізму.