Новыя рэкардсмены Гінеса: крохамабіль і гіганцкі байк (Відэа)

Кніга рэкордаў Гінеcа папоўнілася новымі дасягненнямі з вобласці аўтамабілебудавання.

У прыватнасці, у калекцыю незвычайных дасягненняў увайшлі самы маленькі аўтамабіль і самы вялікі матацыкл у свеце, піша NEWSru.com.

Даўжыня першага транспартнага сродку складае ўсяго 126 см, вышыня - 63,5 см, шырыня - 65,41 см. Стваральнікам крохамабіля стаў жыхар амерыканскага штата Тэхас Осцін Коўлсан, які выкарыстаў для свайго вынаходніцтва дзіцячую калыску і квадрацыкл.

Нягледзячы на такія сціплыя габарыты, аўто з'яўляецца абсалютна паўнавартасным і легальным сродкам перамяшчэння. Яно можа разганяцца да 53 кіламетраў у гадзіну. Аднак, з-за адсутнасці падвескі, ствараецца адчуванне, што рухаешся з хуткасцю 160 кіламетраў у гадзіну, адзначае ўладальнік.

Па словах Осціна, крохамабіль ужо стаў мясцовай славутасцю. Навакольныя з задавальненнем фатаграфуюцца побач з ім, хоць наўрад ці знойдзецца смяльчак, які адважыцца выехаць на ім на ажыўленую трасу.

Іншым рэкардсменам стаў гіганцкі матацыкл вышынёй 5,1 метра, шырынёй 2,49 метра і вагой 5,5 тон. Яго сканструяваў італьянец Фабіа Рэджыані. Супербайк абсталяваны 5,7-літровым рухавіком V8 магутнасцю 280 конскіх сіл і троххуткаснай каробкай перадач. Матацыкл можа ездзіць на двух колах, але для стабільнасці Фабіа дадаў некалькі дадатковых.

Папярэдні рэкорд належаў Грэгары Данхэму з Каліфорніі. Яго матацыкл Monster Cycle вышынёй 3,43 метра меў масу амаль 3 тоны і абсталёўваўся 8,2-літровым рухавіком V8.