«Яндэкс» склаў рэйтынг забабонаў беларусаў

Найбольш жыхароў краіны цікавіць, ці можна глядзецца ў люстэрка ноччу і якія прыкметы для дрэннай рыбнай лоўлі.

За апошнія паўгода беларускія карыстальнікі задалі «Яндэксу» звыш 650 тысяч запытаў са словамі «прыкмета» і «да чаго», піша «Штодзённік».

Часцей за ўсё шукалі прыкметы, звязаныя са снамі: «да чаго сніцца вяселле», «якая прыкмета калі ў сне страціў ключы». Таксама пыталіся і пра падзеі, якія адбываюцца насамрэч. Напрыклад, «што за прыкмета - перагарэлі адначасова ўсе лямпачкі ў кватэры», «голуб заляцеў у акно, якая прыкмета», «да чаго чухаецца левае вуха» ці «да чаго разбіваецца люстэрка».

Як паведамілі ў прэс -службе «Яндэкса», беларусы таксама шукаюць:

- Прыкметы для дрэннай рыбнай лоўлі,

- Да чаго грэчка рассыпалася прыкметы,

- Прыкмета, каб здаць сесію,

- Спыніўся гадзіннік ў 13:13 прыкмета,

- Народная прыкмета, можа я цяжарная, мне прыснілася мыш,

- Разбіць у свята шклянку прыкмета,

- Бацькі ў загсе дрэнная прыкмета,

- Прыкметы, калі жонка вешае памытую бялізну і праз некаторы час пачынаецца дождж,

- Жанчына прыходзіць у дом і п'е ваду з вядра прыкмета,

- Прыкметы, калі бліны не атрымліваюцца,

- Прыкметы падае туфель з правай нагі.

З забабонамі і прыкметамі звязаны і амаль дзве траціны запытаў са словамі «чаму нельга», якія беларусы задаюць «Яндэксу». Напрыклад «чаму нельга стрыгчы мужа».

Тлумачэнне забабонным забаронам карыстальнікі часта шукаюць у сувязі з рознымі важнымі падзеямі ў жыцці. Напрыклад, «чаму нельга жаніцца ў чэрвені», «чаму нельга стрыгчыся падчас цяжарнасці», «чаму нельга хрысціць першую дзяўчынку», «чаму нельга віншаваць загадзя». Таксама шмат павер'яў, звязаных са сном і ноччу.

Топ -5 запытаў беларусаў пра забабонныя забароны

Чаму нельга...

- Глядзець у люстэрка ноччу,

- Дарыць гадзіннік,

- Фатаграфаваць спячых,

- Спаць насупраць люстэрка,

- Адзначаць 40 гадоў.