У Беларусь клічуць турыстаў з В'етнама і Камбоджы

Намеснік міністра спорту і турызму чакае прытоку турыстаў з самых бедных краін Азіі.

Чэслаў Шульга заявіў пра гэта сёння, выступаючы перад журналістамі, перадае БелТА.

Паводле слоў намесніка міністра, у Беларусі дастаткова павольна развіваюцца новыя рынкі экспарту турыстычных паслуг. «У якасці перспектывы мы бачым тут рынкі Паўднёва-Усходняй Азіі і Еўропы. У цяперашні час каля 70% аб'ёму экспарту турпаслуг складае Расея. Пэўную ролю тут аказвае, вядома ж, адсутнасць моўнага бар'ера», - распавёў Чэслаў Шульга. Паводле яго слоў, 70% - гэта досыць сур'ёзная лічба, аднак нічога страшнага ў гэтым няма, напрыклад, у Польшчы прыкладна 45-48% рынку экспарту паслуг займае Германія.

У гэтым годзе экспарт турыстычных паслуг Беларусі павінен скласці $250 млн., штогод ён павялічваецца на 20-30%. «Лічба $250 млн. вельмі сціплая. У нас ёсць вялікі патэнцыял, каб павялічыць экспарт турпаслуг як мінімум у 2-3 разы», - лічыць Чэслаў Шульга. У прыватнасці, плануецца развіваць з краінамі-суседзямі камбінаваныя туры. «Каля 2 млн. турыстаў спыняюцца ў памежных з Беларуссю раёнах, і гэтыя турысты з'яўляюцца патэнцыяльнымі гасцямі нашай краіны», - дадаў намеснік міністра.

Таксама праблемай для развіцця турыстычнага рынку ў Беларусі застаецца ярка выяўленая сезоннасць. «З верасня па красавік турыстычны рынак сур'ёзна прасядае. Пэўную долу экспарту турпаслуг у гэты перыяд даюць гасцініцы і санаторна-курортнае лячэнне, але комплекснага вырашэння праблемы пакуль няма», - рэзюмаваў Чэслаў Шульга.

Рэгіён Паўднёва-Усходняй Азіі, названы намеснікам міністра ў якасці перспектыўнага з пункту гледжання прыцягнення турыстаў, уключае ў сябе В'етнам, Лаос, Камбоджу, Інданэзію, М'янму, і іншыя краіны. Структура іх эканомікі характарызуецца нізкім узроўнем развіцця прадукцыйных сіл, перавагай адсталай сельскай гаспадаркі, панаваннем монакультуры, адсутнасцю або крайняй слабасцю нацыянальнай прамысловасці, залежнасцю ад знешняга рынку.