«Ляпісы» выступяць у падтрымку Навальнага

У пятніцу, 6 верасня, на праспекце Акадэміка Сахарава адбудзецца мітынг у падтрымку кандыдата ў мэры Масквы Аляксея Навальнага.

На ім выступяць «Ляпіс Трубецкі», «Ночные снайперы», «Несчастный случай», «Наадя», Motorama,, Вася Абломаў і Уладзі («Каста»), піша colta.ru.

Мітынг з удзелам 25 тысяч чалавек узгоднены з мэрыяй Масквы з 17:00 да 22:00. Раней кіраўнік выбарчага штаба Навальнага Леанід Волкаў не выключыў, што рух у раёне правядзення акцыі будзе абмежаваны з вечара 5 верасня. Паводле ягоных слоў, гэта патрэбна для ўстаноўкі сцэны.

«Калі мы ператкнем вуліцу, якая ідзе ад транспартнага вузла, трох вакзалаў, вядома, гэта ўскладніць дарожную сітуацыю. Але ў нас іншых пляцовак, на жаль, проста няма», - падае агенцтва словы кіраўніка дэпартамента рэгіянальнай бяспекі сталічнай мэрыі Аляксея Маёрава.

Першапачаткова Навальны хацеў зладзіць мітынг-канцэрт на Вараб'ёвых гарах, аднак гэты варыянт не задаволіў гарадскую адміністрацыю. Улады аргументавалі сваю адмову прысвечанымі Дню горада мерапрыемствамі, якія павінны прайсці на Назіральнай пляцоўцы.

Мітынг на праспекце Акадэміка Сахарава стане апошняй сустрэчай Навальнага з выбарцамі. У гэты ж дзень, 6 верасня, у «Алімпійскім» пройдзе мітынг-канцэрт у падтрымку часовага выканаўцы абавязкаў мэра Масквы Сяргея Сабяніна.

Да сённяшняга дня Навальны правёў ужо каля 100 сустрэч з выбарцамі, аднак усе яны былі не надта шматлікімі. Вялікую сцэну, усталяваную падчас мітынгаў, штаб кандыдата выкарыстаў толькі аднойчы - 25 жніўня ў «Лагунцах». Паводле вынікаў гэтай сустрэчы, на якую, паводле звестак арганізатараў, прыйшлі пад тры тысячы чалавек, паліцыянты затрымалі Навальнага «для размовы», аднак неўзабаве адпусцілі, не выставіўшы ніякіх абвінавачанняў.

Выбары мэра Масквы пройдуць 8 верасня. Акрамя Сабяніна і Навальнага, у іх возьмуць удзел камуніст Іван Мельнікаў, прадстаўнік ЛДПР Міхаіл Дзегцяроў, «эсэр» Мікалай Левічаў і лідар «Яблыка» Сяргей Мітрохін.

Гурту «Ляпіс Трубяцкі» забараняюць выступаць у Беларусі праз крытыку лідарам - Сяргеем Міхалком - рэжыму Лукашэнкі.