Сірыйскі генерал: Асад 34 разы загадваў ужываць хімічную зброю
33- 24.09.2013, 18:34
- 31,223
Генерал сірыйскага войска Захер аль-Сакат адмовіўся выканаць загад дыктатара, а потым збег за мяжу.
Пра гэта ён распавёў у інтэрв'ю брытанскаму выданню The Telegraph.
Захер аль-Сакат адказваў у войску Башара Асада за захоўванне і выкарыстанне хімічнай зброі. Загад аб яе выкарыстанні паступіў асабіста ад дыктатара тройчы. Генерал распавёў, якім чынам яму ўдалося адмовіцца ад яе выканання - атрутныя рэчывы ў кантэйнерах былі замененыя бясшкоднай хлёркай. Спачатку гэтая штука спрацоўвала. «Яны былі абсалютна ўпэўненыя, што гэта былі атрутныя рэчывы, - сказаў Захер аль-Сакат. - Такім чынам, удалося выратаваць сотні жыццяў».
Пасля таго, як загад аб выкарыстанні хімічнай зброі быў аддадзены ў трэці раз - гэта адбылося ў студзені 2013 года - у дачыненні да генерала з'явіліся падазрэнні, звязаныя з адсутнасцю ахвяр у выніку нападаў, якія праходзілі пад ягоным кіраўніцтвам. Тады Захер аль-Сакат наважыў збегчы ў Іарданію. Гэта атрымалася здзейсніць вясной. З тых часоў генерал знаходзіцца на тэрыторыі гэтай арабскай краіны.
Захер аль-Сакат сцвярджае, што Башар Асад ухіляецца ад выканання ўмоваў расейска-амерыканскага пагаднення аб знішчэнні сірыйскай хімічнай зброі. Яе перапраўляюць бліжэйшым хаўруснікам дыктатара - «Хізбаллах», а таксама ў Лібан ды Іран.
«Хімічная зброя ўжо была выкарыстаная ў Сірыі 34 разы, а не 14, як вынікае са звестак замежных разведак», - кажа ён. Генерал паведаміў, што ў такіх нападах выкарыстоўваліся розныя атрутныя рэчывы ў розных канцэнтрацыях. Гэтым тлумачыцца значная розніца ў колькасці пацярпелых, а часам і поўная іх адсутнасць.
Нагадаем, кіраўнік МЗС РФ Сяргей Лаўроў і дзяржсакратар ЗША Джон Кэры 14 верасня ў Жэневе ўзгаднілі парадак вывазу хімзброі з Сірыі або яе знішчэння да сярэдзіны 2014 года. Ён мяркуе, што Арганізацыя забароны хімічнай зброі (АЗХЗ) выпрацуе адпаведны план, для рэалізацыі якога будзе прынятая рэзалюцыя РБ ААН.