Асад пагражае нанесці ўдар па Ізраілі, Іарданіі і Турцыі

Сірыйскі дыктатар рыхтуецца нанесці ўдар па суседніх краінах.

Пагрозы ў адрас Ізраіля, Іарданіі і Турцыі агучыў сёння намеснік міністра замежных спраў Сірыі Фейсал Мікдад. Ён заклікаў суседнія краіны ўстрымацца ад удзелу ў ваеннай аперацыі супраць Дамаска, піша амерыканская газета Wall Street Jounal.

«Дамаск нанясе зваротны ўдар не толькі па Ізраілі, але таксама па суседніх краінах - Іарданіі і Турцыі, калі яны якім-небудзь чынам прымуць удзел у амерыканскай аперацыі», - прыводзіць газета словы Фейсала Мікдада.

Намеснік міністра ўпэўнены ў тым, што аперацыя супраць Башара Асада абернецца хаосам на ўсім Блізкім Усходзе.

«Калі вайна пачнецца, ніхто не зможа кантраляваць сітуацыю. Мы лічым, што любая атака супраць Сірыі, несумненна, выльецца ў хаос ва ўсім рэгіёне, а можа, і за яго межамі», - адзначыў сірыйскі чыноўнік.

Паводле яго слоў, Турцыя і Іарданія павінны «двойчы падумаць», перш чым удзельнічаць у дзеяннях супраць Дамаска, піша «Інтэрфакс».

Фейсал Мікдад таксама заклікаў амерыканскі Кангрэс не ўхваляць ўдар па Сірыі, планы якога прапанаваныя прэзідэнтам ЗША Баракам Абамам.

Нагадаем, члены камітэта па міжнародных справах Сената ЗША ў сераду правядуць пасяджэнне для абмеркавання рашэння прэзідэнта нанесці ўдар па войсках сірыйскага дыктатара.

Праца камітэта будзе праходзіць у закрытым рэжыме, бо на ёй будзе прадстаўленая сакрэтная інфармацыя. Чакаецца, што ў ходзе пасяджэння адбудзецца галасаванне па праекце рэзалюцыі ў падтрымку аперацыі супраць Сірыі.

У сераду таксама адбудзецца першае пасяджэнне камітэта па узброеных сілам сената па гэтай праблеме.

Раней Абама заяўляў пра неабходнасць пакараць сірыйскі рэжым «за ўжыванне хімічнай зброі супраць уласнага народа» 21 жніўня ў ваколіцах сірыйскай сталіцы. Афіцыйны Дамаск пры гэтым катэгарычна адмаўляе прымяненне ЗМЗ супраць свайго насельніцтва, заяўляючы пры гэтым, што гатовы аказаць супраціў любому патэнцыйнаму агрэсару.

Канчатковае рашэнне па ваеннай аперацыі ЗША ў Сірыі Кангрэс ЗША можа прыняць па завяршэнні 9 верасня парламенцкіх летніх вакацый.