Пачалася масавая вакцынацыя супраць грыпу

Усяго ад грыпу плануецца прышчапіць у гэтым годзе больш за 3,5 млн беларусаў.

Пра гэта карэспандэнту БЕЛТА паведаміла загадчыца аддзялення імунапрафілактыкі Рэспубліканскага цэнтра гігіены, эпідэміялогіі і грамадскага здароўя Наталля Шмелева.

«У сувязі з тым, што, паводле прагнозаў СААЗ, варыянты вірусаў грыпу, якія цыркулююць сёлета будуць адрознівацца ад папярэдняга сезону, медыкі рэкамендуюць абавязкова правесці прафілактычныя прышчэпкі», - сказала Наталля Шмелева.

У цяперашнім эпідсезоне ўздым захворвання чакаецца ў характэрныя для рэспублікі тэрміны - у канцы студзеня-пачатку лютага. А так як імунітэт супраць грыпу выпрацоўваецца цягам прыкладна трох тыдняў і захоўваецца блізу паўгода, то аптымальным перыядам для вакцынацыі з'яўляюцца кастрычнік-лістапад.

Вакцынацыя супраць грыпу за кошт рэспубліканскага і мясцовага бюджэтаў будзе праводзіцца вакцынай «Флюваксін». Гэтая вакцына выкарыстоўваецца ў краіне ўжо цягам чатырох гадоў. Прышчэпку супраць захворвання на платнай аснове можна зрабіць і іншымі вакцынамі, дазволенымі да ўжывання ў Беларусі, у тым ліку «Інфлювак» (Нідэрланды), «Ваксігрып» (Францыя), «Ультравак» (Расея), «Грыпол», «Грыпол плюс» (Расея).

Усяго ад грыпу плануецца прышчапіць у гэтым годзе больш за 3,5 млн беларусаў. Бясплатна прэпарат атрымаюць людзі з высокай рызыкай заражэння на грып (дзеці ад 6 месяцаў да 3 гадоў, дзеці з 3 гадоў і дарослыя з хранічнымі захворваннямі, асобы з імунасупрэсіяй, асобы, старэйшыя за 65 гадоў, цяжарныя), а таксама тыя, хто ставіцца да групы высокай рызыкі заражэння грыпам (медыцынскія работнікі дзяржаўных амбулаторна-паліклінічных і бальнічных арганізацый, асобы з устаноў з кругладзённым рэжымам знаходжання дзяцей і дарослых (дзеці ад 6 месяцаў да 3 гадоў, дзеці ад 3 да 18 гадоў і дарослыя), работнікі службаў забеспячэння жыццядзейнасці і бяспекі дзяржавы).