«Газпрам» рэзка скараціў пастаўкі газу за мяжу

«Газпрам» у верасні скараціў пастаўкі газу за мяжу на 24%.

Такую ацэнку прыводзяць аналітыкі «Уралсіб Кэпітал» са спасылкай на папярэднія звесткі ЦДУ ТЭК, паведамляе «Прайм».

Сукупны экспарт «Газпрама», уключаючы ўсе газаправоды і ЗПГ, у мінулым месяцы склаў блізу 13,8 мільярда кубаметраў. Скарачэнне паставак амаль на чвэрць у гадавым вымярэнні адлюстравала зніжэнне экспарту ў краіны далёкага замежжа на 18,6%, а таксама нулявы аб'ём паставак ва Украіну, адзначаюць аналітыкі.

Пры гэтым тэмпы, з якімі падае экспарт «Газпрама», павялічваюцца: у ліпені зніжэнне паставак складала 7%, у жніўні - ужо 12%.

У першай жа палове года сітуацыя была зусім іншая: назіралася павелічэнне экспарту ў краіны далёкага замежжа на 1-2% год да года, тады як сукупны экспарт у першым квартале быў стабільны, а ў другім - вырас на 1%.

Апошнія месяцы шэраг еўрапейскіх краін скардзіліся на тое, што «Газпрам» істотна скараціў пастаўкі. Галоўным чынам скаргі прыходзілі з Польшчы і Славакіі, якія рэверсам пастаўляюць газ ва Украіну. У Варшаве казалі аб практычна двухразовым скарачэнні аб'ёмаў. У выніку Польшча на кароткі час была вымушаная спыніць рэверс ва Украіну.

«Скарачэнне экспарту ў краіны далёкага замежжа ў трэцім квартале на 16% год да года з'яўляецца трывожнай прыкметай таго, што чацвёрты квартал, які акажа больш істотны ўплыў на вынікі за 2014 год, чым другі і трэці кварталы, таксама можа стаць вялікім расчараваннем. Гэта можа адбыцца, калі Газпрам паспрабуе абмежаваць пастаўкі ва Усходнюю Еўропу да ўзроўню фактычнага дзённага спажывання, каб прадухіліць рээкспарт на Украіну», - гаворыцца ў аглядзе «Уралсіб Кэпітал».

Паводле вынікаў года аналітыкі прагназуюць зніжэнне экспарту «Газпрама» на 5%.