БелТА: Польшча мае намер актывізаваць супрацоўніцтва з Беларуссю
7- 1.10.2014, 18:00
- 6,181
Польшча мае намер актывізаваць супрацоўніцтва з Беларуссю ў харчовай прамысловасці і фармацэўтыцы.
Пра гэта паведаміў сёння намеснік міністра эканомікі Польшчы Анджэй Дыха падчас Беларуска-польскага эканамічнага форуму "Добрасуседства-2014", паведамляе афіцыйнае агенцтва БелТА.
Паводле слоў намесніка міністра эканомікі Польшчы, краіны маюць добры досвед супрацоўніцтва ў гэтых сферах, аднак пакуль абодва бакі выкарыстоўваюць патэнцыял не напоўніцу. Сярод прыярытэтных сфер узаемадзеяння таксама вытворчасць мэблі, інфармацыйныя паслугі, міжнародныя перавозкі і турызм.
Анджэй Дыха адзначыў, што Польшча зацікаўленая ў як мага больш хуткім уступленні Беларусі ў Сусветную гандлёвую арганізацыю. "Сітуацыя нашага супрацоўніцтва выглядае нядрэнна, але мы можам дадаць у яе новыя фарбы. Паміж нашымі краінамі няма бар'ераў, мы знаходзімся ў сталым кантакце з беларускімі калегамі з Міністэрства эканомікі і МЗС", - сказаў ён.
Намеснік міністра эканомікі Польшчы мяркуе, што ў будучыні трэба скараціць час перасячэння беларуска-польскай мяжы. "Польшча гатовая абмяркоўваць з Беларуссю гэтае пытанне. Мы будзем старацца разам з беларускімі партнёрамі шукаць развязанні, дзякуючы якім перасячэнне мяжы стала б больш хуткім і танным", - падкрэсліў ён.
XVIII Беларуска-польскі эканамічны форум "Добрасуседства" праходзіць у Берасці 1-2 кастрычніка. У гэтым годзе асноўная тэма форуму - "Польска-беларуская мяжа - мяжа Еўрапейскага Звязу і Адзінай эканамічнай прасторы".