Жыхару Смалявічаў далі 15 дзён арышту за футболку «Свабоду палітвязням»
7- 14.10.2014, 15:42
- 6,211
Актывіста і распаўсюдніка незалежнай прэсы са Смалявічаў Андрэя Кашэўскага затрымалі яшчэ 9 кастрычніка.
Ён праходзіў ля ЦУМа ў Менску ў футболцы з надпісам «Свабоду палітвязням!" і пералікам іх прозвішчаў. Пасля складання трох пратаколаў аб адміністрацыйных правапарушэннях (артыкул 17.1 («дробнае хуліганства»), артыкул 23.34 («несанкцыянаванае масавае мерапрыемства») і артыкул 23.4 ("непадпарадкаванне законным патрабаванням супрацоўнікаў міліцыі») яго пакінулі да суду ў пастарунку, піша сайт ПЦ «Вясна».
10 кастрычніка ў судзе Савецкага раёна Менска суддзя Эдуард Якубоўскі вынес пастанову аб арышце актывіста на 15 дзён. У знак пратэсту супраць несправядлівай судовай пастановы Андрэй Кашэўскі праводзіць акцыю маўчання.
Гэта трэцяя адміністрацыйная справа супраць Кашэўскага ў гэтым годзе.
Фота: nn.by