Замежная палітыка: Крэмль спрабуе ўбіць клін паміж ЕЗ і ЗША

Такім чынам Масква хоча абараніцца ад заходніх санкцый.

Санкцыі, уведзеныя супраць Расеі за акупацыю Крыму і ўмяшанне ва ўсходніх рэгіёнах Украіны, выконваюць сваю задачу, наносячы шкоду Маскве. Але замест таго, каб адступіць, Крэмль хапаецца за кожны клін, які ён можа ўбіць, каб разбурыць далікатную кааліцыю ЗША і ЕЗ, якая забяспечвае сілу гэтай эканамічнай зброі, піша Foreign Policy (пераклад — Инопресса.ру).

"Адзін з удараў у адказ Расеі - указанне на эканамічную шкоду, якую санкцыі наносяць еўрапейцам", - адзначае журналістка. Незадоўга да сустрэчы са сваім амерыканскім калегам расейскі міністр замежных спраў Сяргей Лаўроў падкрэсліў, што ЕЗ плаціць за санкцыі даражэй, чым ЗША. "Ён заявіў, што санкцыі абыдуцца ЕЗ у 40 млрд еўра камерцыйных страт у гэтым годзе і ў 50 млрд - у наступным", - гаворыцца ў артыкуле.

"Я не ведаю, дзе [Лаўроў] узяў гэтыя лічбы", - заявіў былы амбасадар ЗША ва Украіне Стывен Пайфэр. Расейскія ўлады "спрабуюць зразумець, ці змогуць яны ўнесці раскол ў дачыненні паміж Еўропай і ЗША, але я не думаю, што яны даб'юцца поспеху, прынамсі, у кароткатэрміновай перспектыве".

Хоць эканамічны аргумент Лаўрова наўрад ці падзейнічае на еўрапейскіх лідараў, асобныя расейскія кампаніі могуць дамагчыся поспеху ў судзе. "Раснафта", здаецца, раўняецца на Іран, наняўшы адвакацкую кампанію, каб аспрэчыць санкцыі ЕЗ у судзе.

У верасні "Газпромбанк" наняў двух былых амерыканскіх сенатараў для вядзення лабісцкай дзейнасці супраць санкцый ад асобы банка. Паводле заявы аб раскрыцці інфармацыі, пададзенай у сенаце, банк наняў Трэнта Лота і Джона Бро, якія цяпер працуюць на буйную лабісцкую кампанію Сквайр Патан Богс у Вашынгтоне. "Гэта адбылося пасля таго, як расейскі газавы гігант "Новатэк" наняў Qorvis - кампанію, якая займаецца лабіяваннем і піярам", - удакладняе аўтар артыкула.

"Але нават калі "Раснафта" даможацца адмены абмежаванняў ЕЗ, гэтая перамога можа не мець ніякага значэння", - мяркуе журналістка. Сэм Катлер, дарадца-кансультант юрыдычнай кампаніі санкцыйнага права Ferrari & Associates, заявіў, што, прынамсі, падобныя манеўры не прынеслі асаблівага поспеху іранскім фірмам. У многіх выпадках ЕЗ прыстасоўваў свае прававыя абгрунтаванні да выраку суда, а потым зноў уключаў кампанію або банк у санкцыйны спіс.