Грамадзянка Расеі ў Оршы выдала сябе за сацработніцу і абакрала пенсіянера
13- 16.10.2014, 15:20
- 7,363
34-гадовая грамадзянка Расеі выдала сябе за сацыяльную работніцу і зайшла ў кватэру да 89-гадовага пенсіянера.
Жанчына вынесла з дома зберажэнні пенсіянера: паўтара мільёна рублёў, 100 еўра і 600 даляраў. Мужчына выявіў прапажу толькі пасля таго, як жанчына пакінула кватэру. Пенсіянер адразу ж звярнуўся ў міліцыю, піша БелаПАН.
Аршанскім міжраённым аддзелам Следчага камітэта была распачатая крымінальная справа паводле арт.205 КК РБ (крадзеж).
Было высветлена, што жанчына адцягвала ўвагу пенсіянера размовамі аб тым, што ў кватэры трэба правесці касметычны рамонт. Таксама расейка распавядала, што старое пенсійнае пасведчанне мужчыны трэба памяняць на дакумент новага ўзору.
Падчас размоваў жанчына пастаянна перамяшчалася па кватэры і так змагла скрасці зберажэнні пенсіянера.
Следства праводзіць праверку датычнасці жанчыны да ўчынення іншых аналагічных злачынстваў.