Частку тэрыторыі РФ здадуць у арэнду КНДР
30- 16.10.2014, 18:38
- 20,805
Паўночная Карэя мае намер арандаваць 10-15 тысяч гектараў сельскагаспадарчых земляў у Амурскай вобласці Расеі.
Пра гэта паведаміў намеснік кіраўніка Мінусходразвіцця РФ Максім Шарэйкін, паведамляе ТАСС.
Са слоў чыноўніка, Паўночная Карэя хоча арганізаваць на гэтай тэрыторыі сельскагаспадарчую вытворчасць і плануе накіраваць інвестара, які гарантуе адпаведнасць расейскім умовам для арэнды такога зямельнага надзела.
Расея патрабуе у арандатара бізнэс-план з гарантаваным фінансаваннем і тэхналогіяй доўгатэрміновага ўзнаўлення сельскагаспадарчай базы.
Пхеньян ускладае вялікія надзеі на гэты праект, які прадугледжвае стварэнне на расейскім Далёкім Усходзе прадпрыемстваў для вырошчвання збожжа і гародніны. У самой КНДР зямля ў дэфіцыце, што абмяжоўвае магчымасці аграрнай прамысловасці для забеспячэнні насельніцтва прадуктамі харчавання.
Перад краінай з насельніцтвам амаль 25 мільёнаў чалавек за апошнія 20 гадоў не раз паўставала праблема голаду. А Расея ўжо не адно дзесяцігоддзе застаецца самым вялікім рынкам працы для паўночнакарэйскай рабочай сілы.
Так, у раёне Хабараўска брыгады рабочых з КНДР нарыхтоўваюць расейскі лес. Калісьці гэтыя брыгады складаліся з паўночнакарэйскіх зняволеных і людзей, якіх урад КНДР уважаў за нелаяльных.