Авакаў: ДАІ вынесуць за рысу гарадоў, УБАЗ ліквідуюць

У рамках рэформы МУС плануецца ліквідаваць УБАЗ, а ДАІ ў цяперашнім выглядзе будзе несці службу за рысай гарадоў.

Пра гэта на брыфінгу паведаміў міністр унутраных спраў Украіны Арсен Авакаў, паведамляе карэспандэнт ЛІГАБізнесІнформ.

"Не будзе больш такога аб'яднання як УБАЗ. Управа барацьбы з арганізаванай злачыннасцю - гэта хутчэй рэпрэсіўны апарат, чым апарат, які служыць мэтам абароны грамадзян. Тое, што ў ім ёсць карэктнага, карыснага і адэкватнага, пяройдзе ў склад крымінальнага блока. Будзе ліквідаваная транспартная міліцыя... будзе ліквідаваная ветэрынарная міліцыя", - сказаў ён.

Авакаў адзначыў, што за кошт скарачэнняў будзе павялічаны блок аховы грамадскага парадку і расследаванняў. Ён адзначыў, што гэта асабліва актуальна пры тым, што пракуратура з 1 студзеня пазбаўляецца функцый следства.

"Будзе рэфармаваны склад ДАІ. Фактычна, унутры горада, ДАІ і ППС будуць аб'яднаныя ў адную сістэму. ДАІ застанецца як функцыянальны інструмент толькі на дарогах, якія вядуць у населеныя пункты", - дадаў міністр.

Ён паведаміў, што канцэпцыю рэфармавання МУС плануецца прэзентаваць на спецыяльным пасяджэнні ўрада, якое адбудзецца альбо на гэтым тыдні, альбо ў пачатку наступнага.