Жырыноўскі прапанаваў выбіраць Пуціна, як патрыярха
48- 16.10.2014, 20:41
- 19,679
Лідэр ЛДПР заклікаў скасаваць у Расеі наўпроставыя выбары аж да прэзідэнцкага ўзроўню.
Пра гэта, як паведамляе Lenta.ru, палітык заявіў на II Моладзевым законатворчым форуме, выступаючы перад студэнтамі ў Расейскай акадэміі народнай гаспадаркі і дзяржслужбы (РАНГіДС).
Паводле ягоных слоў, наўпроставыя выбары, гэта тыя, у якіх грамадзяне непасрэдна ўдзельнічаюць, трэба пакінуць толькі на мясцовым узроўні. «А ўжо наступны ўзровень выбіраюць яны - каго вы абралі, - разважаў палітык. - Тое ж самае і на гарадскім узроўні, і на рэгіянальным». Наўпроставыя выбары дэпутатаў Дзярждумы таксама не патрэбныя, мяркуе Жырыноўскі.
«І прэзідэнта Расеі трэба выбіраць не ўсенародна, а з дапамогай выбарнікаў ад усіх тэрыторый, - мяркуе лідэр ліберал-дэмакратаў. - Як Патрыярха Маскоўскага. Вось Ельцына абіралі, і што добрага? Я праціўнік анархістычнай дэмакратыі. Дэмакратычны касцюм цесны для Расеі. Яго трэба зняць, выкінуць і надзець імпэрскі касцюм. Трэба мяняць стыль кіравання. У рамках дэмакратыі і рэспублікі дамагчыся выканання законаў немагчыма».
Патрыярх Маскоўскі і ўсяе Русі абіраецца святым сінодам і месцаахоўнікам (біскупам, які часова выконвае абавязкі патрыярха) на Памесным саборы. Сан патрыярха з'яўляецца пажыццёвым.
У сярэдзіне жніўня ў Ялце Жырыноўскі прапанаваў прэзідэнту Уладзіміру Пуціну перайменаваць сябе ў імператара ці вярхоўнага кіраўніка, расейскі трыкалор памяняць на імпэрскі сцяг, а нацыянальны гімн замяніць на «Божа, цара беражы».