Жыхароў Магілёва бясплатна частавалі дранікамі
14- 18.10.2014, 21:05
- 9,242
Фэст «Дранiк-fest» прайшоў 18 кастрычніка ў этнаграфічным комплексе «Зялёны гай» у Магілёве.
Фестываль арганізаваны Цэнтрам гарадскіх ініцыятыў пры падтрымцы Магілёўскага дзяржаўнага ўніверсітэта харчавання.
«Дранікі - папулярная даволі ежа, і яны могуць стаць візітнай карткай нашага горада, якая спадабаецца і магілёўцам, і гасцям Магілёва», - сказаў БелаПАН кіраўнік Цэнтра гарадскіх ініцыятыў Юрый Стукалаў.
Для гасцей свята была магчымасць занурыцца ў нацыянальную беларускую культуру з яе песнямі, танцамі, кулінарнымі традыцыямі. Наведвальнікі змаглі ўбачыць працу кухароў-прафесіяналаў, даведацца класічныя і незвычайныя рэцэпты прыгатавання любімай стравы.
Фестываль складаецца з некалькіх праграм. У конкурснай праграме свята - спаборніцтва каманд профільных ВНУ і каледжаў, якія займаюцца падрыхтоўкай спецыялістаў у сферы грамадскага харчавання.
Таксама працавалі рамеснікі, карыкатурысты, выступалі музычныя фальклорныя калектывы. Студэнцкае этнаграфічнае таварыства арганізавала танцавальныя выступы. Дранікі, а таксама розныя закрасы да іх ды гарачае пітво прапаноўваліся наведвальнікам ў неабмежаванай колькасці і бясплатна.
Адметнай асаблівасцю фэсту стаў яго безалкагольны характар.