ЗША ўвялі санкцыі супраць вугорскіх чыноўнікаў

ЗША ўвялі санкцыі супраць шэрагу вугорскіх чыноўнікаў і бізнэсоўцаў, забараніўшы ім уезд у краіну.

Канкрэтныя імёны грамадзян Вугоршчыны, якіх закранулі абмежаванні, а таксама прычыны прынятай пастановы пакуль невядомыя. Аднак, як паведамляе Deutsche Welle, санкцыі маглі быць уведзеныя ў сувязі з карупцыяй у права-кансерватыўным урадзе Вугоршчыны.

Мясцовыя СМІ, навінавы партал Hungarian Voice, паведамляюць, што ў ліку людзей, якія трапілі пад санкцыі, апынуліся людзі з бліжэйшага атачэння прэм'ер-міністра краіны Віктара Орбана і высокапастаўленыя чыноўнікі падатковай службы. Так, у паведамленнях фігуруюць імёны старэйшага дарадцы кіраўніка ўрада Арпада Хабоні (Árpád Habony) і кіраўніка Нацыянальнага падатковага і фінансавага кіравання Вугоршчыны Ілдзіко Віда (Ildikó Vida), піша Lenta.ru.

У сувязі з увядзеннем абмежаванняў павераны ў справах ЗША ў Вугоршчыне Андрэ Гудфренд (Andre Goodfriend) быў выкліканы ў МЗС краіны для тлумачэнняў.