Ірацкі каваль сам змайстраваў БТР для барацьбы з ісламістамі

Праца заняла ў Шабаза Сіндзі два месяцы.

Ірацкі каваль самастойна змайстраваў бронетранспарцёр (БТР) для барацьбы з баявікамі тэрарыстычнай групоўкі «Ісламская дзяржава» (ІД). Пра гэта паведамляе тэлеканал Russia Today.

Шабаз Сіндзі - каваль з вялікім досведам. Два месяцы цягам 10 гадзін у дзень ён працаваў над машынай, якая стане ягоным унёскам у барацьбу з «Ісламскай дзяржавай». «Браня складаецца з двух слаёў. Першы - здымны, а вось другі зняць нельга. Ён вельмі моцны», - распавядае Шабаз.

Куленепрабівальныя баявая машына Шабаза, разганяецца да 100 кіламетраў у гадзіну, амаль гатовая да бою. Каваль зрабіў па баках адтуліны, якія дазваляюць байцам весці агонь знутры. «Калі трэба весці агонь, вы адкрываеце адтуліны і страляеце, а калі зброю выкарыстоўваць не трэба - зачыняеце іх», - растлумачыў майстар. Шабаз змайстраваў бронетранспарцёр без дапамогі прафесійных інжынераў. У машыне няма якіх-небудзь тэхнічных навінак, затое, на думку Шабаза, ёсць усё патрэбнае.

«Я прыдумляў сам, не выкарыстоўваў якія-небудзь чарцяжы. Да нядаўніх часоў я і не думаў аб зборцы бронетранспарцёра. Гэтая ідэя прыйшла да мяне, калі над намі навісла сур'ёзная пагроза. Я вывучыў характар мясцовасці і дарог, бо трэба было, каб машына магла па іх перасоўвацца. Мне вельмі не ставала патрэбных у такой рабоце спецыяльных інструментаў і прылад, напрыклад, кранаў, якія выкарыстоўваюцца для ўздымання цяжкіх элементаў. Мне давялося ўсё рабіць ўручную», - падзяліўся Шабаз.

Суседзі ім захапляюцца. «Я вельмі ганаруся тым, што ён зрабіў. Гэта дапаможа нам перамагчы ворага», - сказаў адзін са знаёмых каваля. «Мы разумеем, што абараняць нашую зямлю і наш народ можна не толькі на перадавой. Я захапляюся тым, што ён зрабіў усё гэта сам», - адзначыў іншы. Пасля таго, як будзе ўстаўленая апошняя шыба, Шабаз перадасць машыну ў дар атрадам пешмерга. А затым пачне рабіць новую.