Бжэзінскі: Расея ператворыцца ў спустошанага сатэліта Кітая

На думку былога дарадцы прэзідэнта ЗША Збігнева Бжэзінскага, Расея можа паспрабаваць стаць імперыяй, але "гэта будзе правал".

Адзінай перспектывай Расеі ў выпадку паспяховай еўраінтэграцыі Украіны будзе змірыцца з гэтай рэальнасцю і ў выніку самой стаць часткай Еўропы. У адваротным выпадку РФ ператворыцца ў спустошанага сатэліта Кітая. Пра гэта ў эфіры тэлеканала Інтэр заявіў амерыканскі дзяржаўны дзеяч, уплывовы палітолаг і былы дарадца ў нацыянальнай бяспецы прэзідэнта ЗША Збігнеў Бжэзінскі, піша liga.net.

"Украіна прысвяціла сябе свабодзе ў такой меры, што кожны, хто захоча паквапіцца на яе свабоду, будзе ведаць: ён вельмі сур'ёзна рызыкуе. Але Украіна павінна даказаць, што яна на самай справе наважыла быць часткай еўрапейскага свету. Калі яна будзе шчаслівай, адзінай перспектывай Расеі будзе змірыцца з гэтай рэальнасцю і ў выніку самой стаць часткай Еўропы. Калі яна гэтага не зробіць - ператварыцца ў спустошанага сатэліта Кітая. Я не думаю, што гэта добрая перспектыва для Расеі", - заявіў ён.

На думку Бжэзінскага, Расея можа паспрабаваць стаць імперыяй, але "гэта будзе правал".

"Імперыя толькі ў тым сэнсе будзе паспяховай, калі Расеі ўдасца падпарадкаваць Украіну. Але дасягнуць гэтага вельмі складана праз тое, як вы настроены, праз тое, што Захад даволі выразна дае зразумець, што яму не ўсё адно. Але не чакайце, што Захад будзе змагацца за вас - гэта галоўнае, што вы павінны зразумець. У вас павінна быць жаданне зрабіць усё неабходнае, каб абараніць сваю свабоду і тады так ці інакш Захад падтрымае вас і сітуацыя пачне паляпшацца. Па-першае, у вас ёсць падтрымка свету, дэмакратычных краін, і асабліва ЗША, якія больш адкрытыя і адданыя гэтай справе. Па-другое, усё залежыць ад украінцаў, асабліва, новага пакалення, якія нарадзіліся грамадзянамі Украіны, а не Савецкага Саюза", - мяркуе ён.

Былы дарадца прэзідэнта ЗША падкрэсліў, што Захад павінен пераканацца ў тым, што Украіна зможа справіцца з карупцыяй, захаваннем дэмакратычных прынцыпаў і дасягнуць поспехаў у эканамічным развіцці.

"Гэта выклік, які вы павінны пераадолець. І дамагаючыся гэтага, вы ўдасканаліце вашы здольнасці дамаўляцца ў канструктыўнай і ў канчатковым выніку станоўчай манеры з Расеяй, якой давядзецца прайсці праз той жа працэс, калі яна хоча стаць сучасным грамадствам, а не загразнуць у адсталасці і карупцыі, шмат у чым залежачы ад усходняга партнёра, які становіцца толькі мацнейшым", - падкрэсліў Бжэзінскі.

"Будучы аптымістам, я павінен казаць праўду маім украінскім сябрам. Вы павінны выкараніць карупцыю, якая дэмаралізавала не толькі вашу эканоміку, але і ваша паўсядзённае жыццё. І нават дэмаралізавала вашы ўзброеныя сілы. І цяпер вы павінны змірыцца з фактам, што ў наступныя 10 гадоў вы павінны будзеце ахвяраваць шмат чым, каб стаць часткай Еўропы. Упэўнены, вы будзеце вельмі паспяховыя ў Еўропе", - дадаў ён.

Раней Бжэзінскі заклікаў Захад даць лёгкую ракетную зброю Украіне для самаабароны.

Фота: PAP