Румас даў грошай на 25 БелАЗаў

Банк развіцця вылучыў крэдыт на экспарт чарговай партыі тэхнікі БелАЗа.

Крэдытная лінія сумаю 710 млн расейскіх рублёў выдадзеная тэрмінам на 16 месяцаў паводле стаўцы роўнай 2/3 стаўкі рэфінансавання ЦБ РФ (на дзень падпісання дамовы стаўка паводле крэдыта склала 5,5% гадавых) пад страхавое пакрыццё БРУПЭІС «Белэксімгарант», піша БелаПАН.

Крэдыт дадзены для разлікаў з ААТ «БелАЗ» - кіруючая кампанія холдынгу «БелАЗ-Холдынг» за 25 кар'ерных самазвалаў «БелАЗ», пастаўленых у Расею.

У банку нагадалі, што ў гэтым годзе гэта ўжо трэцяя ўгода на набыццё беларускай спецтэхнікі паміж ЗАТ «Гандлёвы дом «БелАЗ» і ААТ «Банк развіцця Рэспублікі Беларусь»: у траўні і ліпені гэтага года ўжо былі заключаны аналагічныя дагаворы на набыццё 16 і 14 адзінак тэхнікі.

Банк развіцця з'яўляецца таксама банкам-агентам беларускага ўрада ў абслугоўванні і пагашэнні замежных дзяржаўных запазычанасцяў і замежных запазычанасцяў, прыцягнутых пад гарантыі ўрада, якія даюцца для фінансавання праектаў, уключаных у дзяржпраграмы. Цяпер фінансаванне дзяржпраграм ажыццяўляецца ў асноўным дзяржбанкамі ААТ «АСБ Беларусбанк» і ААТ «Белаграпрамбанк».

Беларускія ўлады прынялі пастанову аб стварэнні Банка развіцця ў рэкамендацыі Міжнароднага валютнага фонду, які адзначае, што крэдытаванне дзяржпраграм стала крыніцай хранічных праблем дзяржбанкаў з ліквіднасцю, што прыводзіць да неабходнасці іх рэкапіталізацыі, разам з сістэмнай эмісійнай падтрымкай для дзейнасці з боку НББ.