Літва падазрае Расею ў вярбоўцы школьнікаў

Прадстаўнікі этнічных меншасцей Вільнюса прымалі ўдзел у арганізаваных ваенізаваных лагерах ў Расеі.

Пракуратура Літвы пачала расследаванне магчымага аказання ўплыву іншай дзяржавы на дзеянні супраць Літоўскай Рэспублікі. Пра гэта гаворыцца на сайце ведамства, піша «Обозреватель».

Расследаванне накіравана на высвятленне абставін, пры якіх школьнікі этнічных меншасцей Вільнюса прымалі ўдзел у арганізаваных ваенізаваных лагерах у Расеі.

«Будуць высвятляцца акалічнасці ўдзелу вучняў віленскай школы нацменшасцей у ваенізаваных лагерах «Саюз», якія арганізуюцца ў Расеі», - гаворыцца ў паведамленні Генпракуратуры.

Літоўскія палітыкі раней выказвалі занепакоенасць у сувязі з весткай, што вучні адной з мясцовых школ ездзяць у ваенізаваныя лагеры на тэрыторыі Расеі, а ў далейшым нібыта збіраюцца стаць расейскімі дэсантнікамі, піша ru.DELFI.lt.

Прадстаўнік апазіцыйнага кансерватыўнага аб'яднання «Саюз Айчыны - Хрысціянскія дэмакраты» Мантас Адоменас выказаў меркаванне, што падлеткі, якія наведваюць лагеры ў Расеі, могуць быць завербаваны расейскімі спецслужбамі.

«Ім даюцца ваенныя навыкі, зноў жа індактрынацыя, якія могуць быць накіраваны супраць Літвы... Іншымі словамі, літоўскіх грамадзян рыхтуюць дзейнічаць супраць дзяржавы», - дадаў палітык.

Кансерватары звярнуліся ў Генеральную пракуратуру Літвы «з нагоды магчымага ўключэння непаўналетніх у злачынную дзейнасць, накіраваную супраць дзяржавы». Яны таксама прапанавалі праверыць, « ці не дзейнічаюць падобныя сеткі вярбоўкі ў школах нацменшасцей Вільнюса, Клайпеды, Вісагінаса». На час расследавання кіраўнікоў навучальных устаноў, як заявіў Адоменас, варта адхіліць ад працы.

Акрамя таго, кансерватары паабяцалі падрыхтаваць папраўкі ў крымінальнае заканадаўства аб пакаранні за ўдзел «у ваенізаваных падраздзяленнях, якія належаць варожым або патэнцыйна варожым дзяржавам». Да такіх яны аднеслі і Расею.

У жніўні ў Кыргызстане прайшло мерапрыемства «Саюз 2014 - Нашчадкі Перамогі» - ваенізаваны лагер прарасейскага характару. Навучанне там праходзіла ў тым ліку група маладых людзей з Латвіі, Эстоніі і Літвы.