Менская турфірма падманула 30 чалавек

Па меншай меры 30 чалавек пацярпелі ад дзеянняў турыстычнай кампаніі «Неролі».

Як паведамлялася раней, у пачатку кастрычніка ў Мінспорту сталі паступаць скаргі ад кліентаў ПУП «Неролі». Турфірма займалася арганізацыяй тура ў Ізраіль. Аднак, спаслаўшыся на тое, што ў краіне ідуць баявыя дзеянні, адмяніла паездку. Турыстам прапанавалі выбраць іншы накірунак, аднак паслугі так і не былі аказаны, пішуць «Беларускія навіны».

Пацярпелыя турысты паспрабавалі звярнуцца ў кампанію са скаргамі, але офіс фірмы апынуўся зачынены, на званкі ніхто не адказваў, месцазнаходжанне дырэктара фірмы ўсталяваць не ўдалося.

Як удакладніў дырэктар дэпартамента турызму Міністэрства спорту і турызму Вадзім Кармазін, ад дзеянняў фірмы пацярпелі як грамадзяне, якія набылі пуцёўкі ў Ізраіль коштам каля 1,7-1,8 тыс. даляраў, так і беларусы, якія пажадалі адпачыць у Грэцыі і ў беларускіх санаторыях.

Паводле слоў спецыяліста, у Мінспорту паступілі тры афіцыйныя скаргі на дзеянні ПУП «Неролі». «Мы бачым, што паступілі на іх скаргі ў РУУС Кастрычніцкага раёна. Каля 30 прэтэнзій ёсць на гэтую фірму, - адзначыў ён. - Я думаю, што тут ёсць не гэтулькі парушэнне правоў спажыўцоў, колькі крымінальны складнік. Тут павінны далучыцца ў тым ліку органы ўнутраных спраў, таму што месцазнаходжанне фірмы пакуль невядома».

Мінспорту і турызму рэкамендавала пацярпелым накіроўваць скаргі ў Міністэрства гандлю, мясцовыя выканаўчыя органы, а таксама звяртацца ў грамадскія аб'яднанні абароны правоў спажыўцоў і праваахоўныя органы. Акрамя таго, у ведамстве параілі грамадзянам пры планаванні падарожжаў «заўсёды старанна і ўзважана падыходзіць да выбару тура і турыстычнай кампаніі», уважліва вывучаць умовы дагавора аказання турыстычных паслуг, цікавіцца становішчам у краіне наведвання, а таксама патрабаваць правядзення інструктажу аб захаванні правіл асабістай бяспекі.