Лукашэнка - пісьменнікам: Чаму за 20 гадоў у Беларусі не з'явілася «Вайны і міру»?

Дыктатар незадаволены пісьменнікамі.

Пра гэта ён заявіў 23 кастрычніка на сустрэчы з прадстаўнікамі творчай інтэлігенцыі, паведамляе БелТА.

«У чым прычына таго, што за мінулыя 20-30 гадоў так і не з'явіліся сучасныя «Вайна і мір», «Узнятая цаліна»? Гэта што, адсутнасць талентаў? Ці аб'ектыўныя ўмовы жыцця, калі кніга перастае быць галоўнай крыніцай інфармацыі?» - спытаў ён.

Лукашэнка мяркуе, што не варта звязваць перамены ў чытацкай свядомасці толькі з тэхналагічнай рэвалюцыяй. На ягоную думку, напружаны рытм жыцця зрабіў стаўленне да літаратуры прагматычным.

«Наш сучаснік выбірае кнігі, якія дзівяць яго тэмай, героямі альбо становяцца лекамі ад нуды. Сур'ёзная літаратура ператвараецца ў чытанне для інтэлектуалаў, - адзначыў ён. - Вучоныя сцвярджаюць, што эканамічныя, палітычныя, вайсковыя перавагі дзяржавы не ажыццяўляюцца самі па сабе. Яны заўсёды частка і следства яе духоўнасці і культуры. Развіццё грамадства, жыццё нацыі магчымыя толькі з апорай на вечную трыяду: навуку, адукацыю, культуру».