YouTube уводзіць платную падпіску

YouTube плануе ўвесці магчымасць платнай падпіскі, якая дазваляе прайграваць ролікі без рэкламы.

Пра гэта паведаміла гендырэктар відэасэрвісу Сюзан Важыцкі на канферэнцыі Code/Mobile, піша Lenta.ru.

Такі крок падасць карыстальнікам больш выбару паміж рознымі варыянтамі спажывання відэакантэнту, тым больш, што ў наш час усё часцей людзі глядзяць відэа менавіта праз прыкладанні на мабільных прыладах, адзначыла Важыцкі.

Падобны механізм зараз працуе ў мабільных прыкладаннях: карыстальнік можа спампаваць бясплатны сэрвіс ці гульню на сваю прыладу з паказам рэкламы, альбо заплаціць невялікую суму за версію без рэкламных аб'яў. У цяперашні час, паводле слоў Важыцкі, кампанія думае над тым, як можна рэалізаваць гэтую ідэю на YouTube.

Адным з першых прыкладаў безрэкламнай падпіскі можа стаць музычны сэрвіс, распавяла крыніца The Wall Street Journal.

Аб планах YouTube аб стварэнні музычнага онлайн-сэрвісу, які дапоўніць асноўны відэахостынг, стала вядома ў чэрвені гэтага года. Ён будзе называцца YouTube Music Key, а плата за карыстанне ім складзе 10 даляраў у месяц.

Таксама YouTube пачаў дамаўляцца з праваўладальнікамі наконт іх удзелу ў стварэнні падпісных каналаў для будучага відэасэрвісу, якія спецыялізуюцца на пэўных відах кантэнту, такіх як, да прыкладу, навіны, распавяла крыніца газеце. Новаўвядзенне будзе дапаўняць цяпер існую асноўную мадэль выкарыстання YouTube з рэкламай.

Сюзан Важыцкі - былы топ-менеджэр Google, якая займалася доўгія гады рэкламным напрамкам у кампаніі. У лютым гэтага года яна ўзначаліла відэахостынг, які Google купіла ў 2006 годзе за 1,65 мільярда даляраў.