Пасля няўдалай спробы рабавання гарадзенец успароў вены шпількай (Відэа)

Незвычайнае рабаванне адбылося 2 кастрычніка ў краме кампутарнай тэхнікі на вул Урублёўскага ў Гародні.

Пасля ўчынення злачынства адзін з рабаўнікоў вярнуўся на патрабаванні прадаўца, аддаў ўкрадзенае, а потым у чаканні міліцыі паспрабаваў парэзаць сабе вены, спачатку шпількай, а пасля і канцылярскім нажом, піша 015.by.

Не ведаючы пра тое, што кампанія акрамя продажу кампутараў і камплектуючых да іх, займаецца сістэмамі відэаназірання, чацвёра маладых людзей наважыліся ўчыніць крадзеж. Толькі ў адной зале, дзе было ўчынена злачынства, устаноўлена 6 камер. З іх дапамогай атрымалася запісаць ўсе дзеянні падазраваных.

Увайшоўшы ў гандлёвую залу па-чарзе, маладыя людзі разышліся па памяшканні, выказваючы зацікаўленасць у набыцці. Верагодна, такі манеўр павінен быў усыпіць пільнасць прадаўца, але акторская гульня «пакупнікоў» правалілася.

Агулам час знаходжання хлопцаў у краме склаў прыкладна паўтары хвіліны. Адзін з хлопцаў, трохі пастаяўшы ля вітрыны, схаваў тавар пад адзеннем і адразу ж накіраваўся да выхаду разам са сваімі таварышамі.

Але ў гэты момант нешта пайшло не так. Злодзея паклікаў прадавец і папрасіў таго вярнуцца.

Трое паспелі збегчы, а чацвёрты, як ні ў чым не бывала, дастаў тавар з-пад курткі і аддаў прадаўцу. Ён жа вярнуўся з ім да месца злачынства. Пасля гэтага малады чалавек зрабіў спробу сысці, але быў спынены супрацоўнікамі крамы.

Як растлумачылі ў кіраўніцтве крамы, злодзей да апошняга спадзяваўся на тое, што будзе адпушчаны, але, калі зразумеў, што гэтага не адбудзецца, знайшоў у кішэні шпільку і паспрабаваў ёю ўспароць сабе вены... Няўдача не спыніла мужчыну, са стала прадаўца ён схапіў канцылярскі нож і зноў паспрабаваў «ускрыць».

Нож у яго адабралі. Тут хлопец стаў істэрычна крычаць, што сплывае крывёй, патрабуючы выклікаць хуткую і аказаць яму дапамогу. Агулам, яго патрабаванні былі выкананыя - разам з работнікамі хуткай на злодзея-самазабойцу запрасілі паглядзець і супрацоўнікаў міліцыі.