Больш за 20 бяздомных жывёл знайшлі гаспадароў на акцыі ў Менску

У Міжнародны дзень абароны жывёл у парку імя 50-годдзя Вялікага Кастрычніка адбылася дабрачынная акцыя «Давай дапаможам!».

ГААЖ «Эгіда» арганізоўвае такое мерапрыемства восьмы год. Валанцёры прывялі ў парк 100 чатырохногіх падапечных. Коткі ды сабакі, бяздомныя ў мінулым, цяпер знаходзяцца пад іх апекай. Валанцёры ўтрымліваюць жывёл у прытулках і ў сябе ў кватэрах да таго, да таго часу, як знойдуць для іх ласкавых гаспадароў, піша «Мінск-навіны».

Так, напрыклад, прывялі на акцыю 7-гадовую аўчарку.

- Год таму зімой сабака прыбіўся да пад'езда майго дома, - распавядае валанцёр. – Ён аднекуль доўга бег - лапы былі збітыя ў кроў, моцна знясілены. Мы ўзялі яго да сябе, выхадзілі, вылечылі. Ветэрынары выказалі здагадку, што яго выкінулі нядбайныя заводнікі, якія рабілі на гадаванцах бізнэс. Сабака актыўны, аднак выглядае значна старэйшым за свае гады, часта прыводзіў прыплод. Хутчэй за ўсё, гаспадары пазбавіліся ад яго, як толькі рэпрадуктыўная функцыя знізілася.

Берце прадаўжаюць шукаць новы дом. Берта любіць дзяцей, але не ладзіць з іншымі свойскімі сабакамі.

З прытулку «Дом сабачай надзеі» прывезлі трох жывёл. Няўладкаванымі засталіся Сасіска і Айка.

- У гэтым годзе, на жаль, не было магчымасці арганізаваць нашую акцыю ў парку імя Горкага, а там звычайна больш наведвальнікаў і атрымоўваецца збыць больш катоў і сабак, - кажа валанцёрка Мая. - Усяго на акцыі знайшліся гаспадары тром дарослым сабакам і пяці катам. Таксама ў сем'і адправіліся сямёра шчанюкоў і дзевяць кацянят.

Амерыканскі стафардшырскі тэр'ер, кінуты безадказнымі людзьмі, здабыў новую гаспадыню.

На мерапрыемстве працавалі ветэрынары. Да іх па кансультацыі звярталіся новыя «сабакары» і «кашатнікі».

- Візуальна ўсе жывёлы здаровыя, - кажа ветэрынарка прыватнай ветэрынарнай клінікі «Доктар Вет» Юлія Юр'ева. - Але, вядома, некаторыя хваробы можна выявіць толькі з дапамогай аналізаў.

У парку падчас акцыі дзейнічала палатка дапамогі, куды неабыякавыя людзі прыносілі ланцужкі, нашыйнікі, латкі, сумкі-пераноскі, корм, лекі для жывёл у прытулках.

- Мы з мужам знайшлі ў Інтэрнэце спіс рэчаў, якія заўсёды спатрэбяцца ў прытулках, і выдзялілі на дабрачыннасць некаторую частку бюджэту. У нас нованароджанае дзіця, таму пакуль не можам узяць гадаванца. Як толькі дачка падрасце, возьмем сабаку з прытулку, - распавядае Таццяна. - Акцый такіх павінна быць больш. Можа, тады людзі перастануць купляць сабак і катоў за шалёныя грошы ў гадавальніках, спецыяльных клубах, а прыглядзяцца да тых, хто не элітнай крыві, але гатовы быць адданым сябрам.

Напярэдадні ў пункт прыёму і часовага ўтрымання жывёл, што знаходзіцца на вуліцы Гурскага, здалі восем 5-тыднёвых шчанюкоў. Валанцёры адразу іх адтуль забралі і прынеслі малых у парк, каб збыць падчас акцыі. Двум шчанюкам пашанцавала - з акцыі яны адправіліся ў новы дом.