Кошты на арэнднае жыллё ў Менску працягваюць зніжацца
23- 6.10.2014, 14:27
- 18,741
На сённяшні дзень сярэдні кошт арэнды аднапакаёвай кватэры ў Менску складае $300.
Сітуацыю і тэндэнцыі на рынку арэнднага жылля ў экспрэс-каментарах «Салідарнасці» ахарактарызавалі экспэрты. Намесніца дырэктара ў арэндзе жылля агенцтва нерухомасці «Твая сталіца» Наталля Радзеня адзначае дынаміку зніжэння кошту. З яе слоў, на сённяшні дзень сярэдні кошт арэнды аднапакаёвай кватэры ў Менску складае $300. Бываюць варыянты і за $280.
- За $300 можна знайсці кватэру ў прыстойным стане - з касметычным рамонтам, мінімальным камплектам мэблі і бытавой тэхнікі (халадзільнік, тэлевізар), - распавяла Наталля Радзеня. - «Аднапакаёўкі» за $400 - гэта больш сучасная кватэра з ламінаванымі падлогамі, металічнымі дзвярыма, шклопакетамі, камплектам мэблі, пральнай машынай-аўтаматам.
Двухпакаёўкі маюць сярэдні кошт $400, але сустракаюцца аб'явы, дзе ўласнікі прапануюць кватэры ад $380.
Сярэдні кошт арэнды трохпакаёвай кватэры $450. Ёсць варыянты, калі прапаноўваюцца «траячкі» ад $400 плюс камунальныя плацяжы.
Зніжэнне коштаў на арэндным рынку жылля экспэрт звязвае з адсутнасцю ў гэтым годзе ажыятажнага попыту на жыллё.
- Студэнцкі бум, які звычайна назіраўся з ліпеня да верасня, у гэтым годзе не адбыўся. Кошты не падаграваліся. Адпаведна, роўны попыт і спакойнае становішча на рынку арэнды жылля прывяло да тэндэнцыі зніжэння коштаў, - кажа яна.
Акрамя таго, на думку экспэрта, попыт на арэнднае жыллё не настолькі вялікі, як раней. На рынку арэнды досыць вялікая колькасць прапаноў.
- Таму сёння той, хто здымае аднапакаёвую кватэру прыкладна за 350 даляраў, не паедзе ў першую, якая патрапіла, а паглядзіць 2-3 варыянты, - кажа яна.
Наталля Радзеня прагназуе, што бліжэйшым часам на рынку арэнднага жылля захаваецца дынаміка зніжэння коштаў.
Начальнік аддзела арэнды агенцтва нерухомасці «Квадратны метр» Міхаіл Рагаўцоў прыводзіць наступныя кошты на кватэры ў Менску: «аднапакаёўкі» - $350, «двухпакаёўка» - $430 (гэты кошт трымаецца на працягу двух месяцаў), «трохпакаёўкі» - ад $500, віп-кватэры з добрым рамонтам - ад $1000.
- Мы меркавалі, што кошты на двухпакаёвыя кватэры знізяцца пасля таго, як схлынуць студэнты. Але гэтага не адбылося. Больш за тое, мы назіраем ажыўленне на рынку, - мяркуе ён.
Суразмоўца звязвае гэта з тым, што ў Беларусь прыехала шмат грамадзян Украіны.
Сітуацыю на рынку арэнды жылля экспэрт ацэньвае як стабільную і не бачыць перадумоў для яе змены:
- На гэты момант ёсць баланс попыту і прапановы.