П'яны кіроўца без пасведчання ў Берасці зламаў нос інспектару ДАІ

Два пераследы праводзілі ўчора супрацоўнікі Берасцейскай ДАІ.

У абодвух выпадках ад інспектараў спрабавалі схавацца не зусім адэкватныя кіроўцы: кіроўца Ford Galaxy ў п'яным выглядзе вёз 2-іх дзяцей дашкольнага ўзросту, а аўтамабіліст на Audi і зусім напаў на інспектара, калі яго паспрабавалі затрымаць, піша «Рэальны Брэст».

5 кастрычніка а 22:30 увагу супрацоўнікаў ДАІ прыцягнуў аўтамабіль Ford Galaxy, на пасажырскім сядзенні якога без утрымліваючага прыстасавання знаходзілася малалетняе дзіця прыблізна 3 гадоў. А на заднім сядзенні з боку ў бок перакідвалася па салоне яшчэ адно дзіця прыкладна 4-гадовага ўзросту. Патрабаванне работнікаў ДАІ спыніцца кіроўца праігнараваў і «дадаў газу». Супрацоўнікі Дзяржаўтаінспекцыі ўключылі сігнальныя маячкі сіняга і чырвонага колеру і пачалі «мяккі» пераслед. Неўзабаве кіроўца заехаў на дваровую тэрыторыю, дзе і быў спынены інспектарамі. Для таго, каб не напалохаць дзяцей, затрымлівалі іх бацьку тактоўна. Праз адчыненыя дзверы я пазнаў характэрны пах алкаголю, медыцынскі агляд паказаў пазней больш за 1 праміле. На пытанне, хто можа забраць дзяцей, пакуль будзе весціся адміністрацыйны працэс, кіроўца адказаў, маўляў, іх маці засталася ў гасцях, дзе яны разам распівалі алкагольныя напоі. Кіроўцу, акрамя пазбаўлення пасведчання кіроўцы, пагражае велізарны штраф па чатырох пратаколах. Гэта другі выпадак у Берасцейскай вобласці ў гэтым годзе, калі бацька з двума непаўналетнімі дзецьмі кіруе аўтамабілем у нецвярозым стане.

У той жа дзень, толькі раніцай, супрацоўнікамі Дзяржаўтаінспекцыі быў пададзены сігнал аб спыненні кіроўцы аўтамабіля Audi 100, які той праігнараваў і не спыніўся. Калі аўто ўсё ж удалося спыніць, з яго выйшаў мужчына 1989 нараджэння, жыхар Берасця. У момант затрымання ён ужыў гвалт у дачыненні да супрацоўніка ДАІ, ударыўшы таго галавой у вобласць твару, зламаўшы яму нос. Яго затрымалі, была распачатая крымінальная справа паводле артыкула 364 КК «Гвалт у дачыненні да супрацоўніка органаў унутраных спраў з мэтай перашкодзіць яго законнай дзейнасці». Хлопцу пагражае пакаранне ў выглядзе арышту на тэрмін ад трох да шасці месяцаў, або абмежаванне волі на тэрмін да пяці гадоў, або пазбаўленне волі на тэрмін да шасці гадоў. Падазраваны не меў пасведчання, ніколі яго не атрымліваў. У дачыненні да яго пасажыраў, уключаючы дзяўчыну, з якой кампанія пазнаёмілася за гадзіну да здарэння, таксама былі складзеныя пратаколы паводле артыкула «Дробнае хуліганства» за агрэсіўныя паводзіны падчас затрымання. Раней кіроўца неаднаразова быў судзімы, у тым ліку, і за асабліва цяжкія злачынствы. Ад праходжання медыцынскага агляду адмовіўся.