Польскія інтэлектуалы: Для дапамогі Украіне неабходныя не словы, а дзеянні

Аказаць рэальную дапамогу Украіне і спыніць агрэсію Масквы трэба зараз жа.

Пра гэта гаворыцца ў заяве польскіх інтэлектуалаў, якую даслалі ў рэдакцыю charter97.org. Зварот падпісалі Збігнеў Буяк, Зофія Рамашэўска, Чэслаў Бялецкі, Багдан Ліс, Мацей Зэмба, Уладзіслаў Фрасынюк, Ян Маліцкі, Пётр Тыма, Павел Тжціньскі, Ян Пекла, Ян Крыстоф Келюс, Міраслаў Хаецкі, Тадэвуш Едыняк, Збігнеў Янас, Казімер Вуйціцкі.

«Сёння Украіна мае патрэбу ў дапамозе дэмакратычных дзяржаў і грамадзянскай супольнасці. Мы абавязаныя аказаць гэтую дапамогу краіне, дзе партрэт Шаўчэнка вісіць у кожным доме, дзе ягоную свабодалюбную паэзію чытае і спявае амаль кожны грамадзянін.

Мы, палякі, - народ, які да свабоды прывяла «Салідарнасць» і міжнародная салідарнасць з «Салідарнасцю», і ў нас ёсць абавязанні заахвочваць свабоду і дэмакратычныя памкненні нашых усходніх суседзяў.

Мы павінны памятаць, што без свабоднай і незалежнай Украіны няма бяспечнай Польшчы і бяспечнай Еўропы. Украіна абрала еўрапейскі варыянт, які мае стратэгічнае значэнне для ўсёй еўраатлантычнай цывілізацыі, у тым ліку, у прыватнасці, для Польшчы. Калі ўдасца з дапамогай ЕЗ і ЗША пераадолець цяперашні крызіс, Украіна стане адным з нашых найважнейшых гандлёвых і палітычных партнёраў», - гаворыцца ў заяве.

Падтрымка Украіны ва ўсіх абласцях - абавязак і палітычная задача Польшчы.

«Гэта стала мэтай польскай «Салідарнасці» у нашым пасланні народам Цэнтральнай і Усходняй Еўропы. Гэта прысутнічала ў стратэгічным мысленні польскай эміграцыі. Дастаткова згадаць постаць Ежы Гедройца і Юліуша Мерашэўскага. Гэта было таксама асновай палітыкі салідарнасці ўрадаў III Рэспублікі, таму што Польшча была першай, хто безумоўна падтрымаў незалежнасць Украіны.

Сёння украінцы змагаюцца за вашу і нашу свабоду, і менавіта таму Польшча павінна падтрымліваць Украіну ва ўсіх галінах:

- Палітычнай, праз падтрымку, інфармаванне і тлумачэнні ў ЕЗ і NATO, якой ключавой з'яўляецца роля Украіны ў сістэме бяспекі ўсяго рэгіёну.

- Вайсковай, шляхам падтрымкі ўкраінскага войска баявой тэхнікай, навучаннем і кансультацыямі, а таксама падтрымкай украінскіх імкненняў уступіць у NATO.

- Эканамічнай, прапаноўваючы падтрымку ў рэфармаванні краіны, якая складаецца з дэ-манапалізацыі галін рынку, у тым ліку парушэнне алігархічных манаполій і іх уплыў на палітыку ўрада. Пад падтрымкай мы таксама разумеем лабіраванне падтрымкі МВФ, Сусветнага банка, ЕЗ і двухбаковых пагадненняў з вядучымі эканамічнымі краінамі.

- Сацыяльнай, стымулюючы сумесныя ініцыятывы на розных узроўнях, абмен досведам праз візіты і практыкі ў ключавых інстытутах дзяржаўнага кіравання, стварэнне і адкрыццё магчымасцяў для працаўладкавання.

- Культурнай і навуковай, падтрымкі сумесных ініцыятыў, дапамагаючы прасоўваць украінскую культуру і навуку ў ЕЗ, шляхам арганізацыі стыпендыі для ўкраінцаў, клапоцячыся пра агульную культурную спадчыну.

- Энэргетычнай бяспекі, шляхам тэхналагічнай і фінансавай падтрымкі ўкраінскай горназдабыўнай прамысловасці газу, нафты і вугалю. Колькасць украінскіх месцанараджэнняў можа быць будучыняй энергетычнай бяспекі ЕЗ», - адзначаецца ў заяве.

Польшчы неабходна зрабіць усё, каб спыніць агрэсію Масквы цяпер.

«Украіна была атакаваная Масквой, цывілізацыйны поспех нашага суседа стымуляваў бы рэформы ў самой Расеі. Калі мы прайграем барацьбу за суверэнную і дэмакратычную Украіну, давядзецца лічыцца з магутнай хваляй бежанцаў у Польшчу і ЕЗ, і ля нашых межаў з'явіцца зона хаосу і нестабільнасці, кіраваная Масквой. У гэтых умовах Расея будзе весці надалей імперскую экспансію ў сваёй былой «сферы ўплыву». Таму неабходна зрабіць усё, што ў нашых сілах, каб спыніць агрэсію Масквы цяпер. Кожны месяц затрымкі і любыя саступкі - гэта час на адраджэнне імперыі з яе агрэсіўнай палітыкай супраць дэмакратычнага свету і аўтарытарных урадаў над іх уласным грамадствам.

Сённяшняя палітыка Еўропы і ўсяго дэмакратычнага свету адмаўляе палітычнае бачанне Робэрта Шумана, Жана Манэ і Конрада Адэнаўэра. Грамадзяне Украіны спрабуюць змяніць геапалітычную сітуацыю ва ўсходняй частцы Еўропы, часам нават коштам свайго жыцця. Яны ў стане зрабіць гэта з нашай дапамогай. Гэта змяненне паслужыць стабільнасці і бяспецы ў ключавой для Еўропы і свету частцы нашага кантынента. У дваццаць першым стагоддзі супрацоўніцтва паміж нашымі народамі мае важнае значэнне для ўсёй супольнасці дэмакратычных дзяржаў. Толькі шляхам яе аднаўлення мы будзем у стане пацвердзіць, што ўсе ахвяры нашых братазабойчых бітваў былі не марнымі.

Мы выступаем у якасці тых, хто быў гатовы заплаціць за польскую свабоду, не чакаючы, пакуль хтосьці нам яе падорыць, і хто гатовы быў абараняць свабоду нават супраць польскіх прыгнятальнікаў. Такім чынам, сёння мы кажам, што цяпер - апошні момант, каб дапамагчы ўкраінцам падтрымаць сваю адданасць нашай агульнай справе. Калі грамадзяне Украіны паказваюць, што яны здольныя на самыя высокія ахвяры, неабходныя не нашы словы, а дзеянні», - падкрэсліваецца ў заяве.