Украінцы, беларусы і палякі «павіншавалі» Пуціна з 62-годдзем
5- 8.10.2014, 8:40
- 18,188
У Варшаве каля амбасады Расеі прайшоў мітынг прысвечаны дню нараджэння Уладзіміра Пуціна.
У пачатку сустрэчы арганізатары звярнулі ўвагу прысутных, што ў гэты дзень 8 гадоў таму была забітая расейская журналістка і праваабаронца Ганна Паліткоўская, якая выступала супраць палітыкі ўладаў сваёй краіны.
У якасці падарункаў былі паднесеныя «акрываўлены» торт і сырое мяса, якія са слоў Наталлі Панчанкі, кіраўніка «Еўрамайдану ў Варшаве» сімвалізуюць «кроў і смерць, якія так любіць Пуцін».
У пікеце брала ўдзел польскі палітык, сябра партыі «Права і Справядлівасць» Малгажата Гасеўска, якая падарыла Пуціну ягоны партрэт побач са Сталіным і Гітлерам, а таксама кніжку «Лячэнне дзяцей ад псіхічных траўмаў». «Я не магла прапусціць сённяшняе мерапрыемства. Таму што на любой акцыі, на якой пратэстуюць супраць сусветнага тэрарыста №1 мы абавязаныя быць», - сказала яна.
Цягам паўтары гадзіны ўкраінцы, беларусы і палякі, якія ўдзельнічаюць у пікеце віншавалі Пуціна. Кожны ахвотны мог падысці да мікрафону і сказаць словы зычэнні і падарыць падарунак, які арганізатары абяцалі адправіць у Крэмль.
«За маёй спіной знаходзіцца плакат з фотаздымкамі злачынстваў Пуціна: Курск, Беслан, Чачня, Грузія, Украіна і на ім яшчэ ёсць шмат вольнага месца. Таму кожны з вас можа пакінуць сваё зычэнне, а я яму зычу Майдана на Краснай плошчы», - сказаў Томаш Чувара, прадстаўнік фонду «Адкрыты дыялог».
«Гэтаму чалавеку я магу зычыць толькі аднаго: хутчэй апынуцца там, дзе ён павінен быць - у клетцы на міжнародным трыбунале ў Гаазе», - сказаў беларускі апазіцыянер Вячаслаў Сіўчык.
У акцыі ўзяў удзел актывіст з Татарстана Нафісы Кашапаў, які быў вымушаны пераехаць у Польшчу, бо праследаваўся з боку ФСБ. «10 гадоў таму ў гэты дзень пратэставаў у Маскве супраць палітыкі Пуціна. У мяне быў плакат з надпісам: «ФСБ - гэта карная арганізацыя». 10 гадоў прайшло - нічога не змянілася», - сказаў ён.
Прагучалі дзесяткі зычэнняў, у якіх людзі зычылі Пуціну справядлівага пакарання, а простым расейцам хутчэй пазбавіцца ад тырана. Скончылася акцыя выкананнем гімна Украіны.