Расследаванне Смаленскай катастрофы ў Польшчы падоўжанае да 2015 года
7- 8.10.2014, 19:06
- 7,943
Адна з прычын такой пастановы - чаканне далейшых экспэртных высноў.
Галоўная вайсковая пракуратура Польшчы падоўжыла расследаванне прычын смаленскай авіякатастрофы 2010 года, у якой, сярод іншых, загінулі прэзідэнт краіны Лех Качыньскі з жонкай, паведамляе беларуская служба «Польскага радыё».
Пракурор Галоўнай управы Вайсковай пракуратуры прыняў пастанову падоўжыць расследаванне смаленскай катастрофы да 10 красавіка 2015 года - распавёў прадстаўнік пракуратуры, маёр Марцін Максьян. Ён падкрэсліў, што адна з прычын такой пастановы - чаканне далейшых экспэртных высноў.
«Прынамсі, маецца на ўвазе меркаванне Тэхнічнага інстытута Паветраных сіл у Варшаве, які даследуе абломкі металу з бярозы на дарозе самалёта, таксама мы чакаем высноў судмедэкспэртызы ахвяраў авіякатастрофы», - сказаў ён.
Тым часам 30 сем'яў ахвяраў смаленскай авіякатастрофы напісалі ліст прэзідэнту Польшчы з заклікам ініцыяваць будаўніцтва манумента ў памяць тых, хто пацярпеў у гэтай трагедыі. Бліжэйшыя дні Браніслаў Камароўскі павінен сустрэцца з прадстаўнікамі сем'яў загінулых, каб абмеркаваць свой удзел у гэтай справе.