Украіна шукае беларуса паводле справы аб трагедыі ў Адэсе 2 траўня

МУС Украіны завяршыла першую частку расследавання масавых беспарадкаў, якія адбыліся 2 траўня 2014 года ў Адэсе.

Усяго паводле гэтай справы ў якасці падазраваных праходзяць 34 чалавекі. Сярод іх - і грамадзянін Беларусі Алег Шабалін, які аб'яўлены ў вышук.

Пра гэта паведамляе выданне dumskaya.net.

Першымі ў суд будуць пададзеныя абвінаваўчыя акты ў падзеях, якія адбываліся ў раёне Саборнай і Грэчаскай плошчаў. Крыніцы выдання ў праваахоўных органах удакладнілі гэтую інфармацыю. Паводле іх звестак, перад судом бліжэйшым часам паўстане толькі частка актыўных удзельнікаў трагедыі, а менавіта любіцелі Расеі з арганізацый «Народная дружына», «Адэская дружына» і «Праваслаўнае казацтва».

Нагадаем, 19 траўня Служба бяспекі Украіны паведаміла, што паводле падазрэння ў падрыхтоўцы тэракту ў Адэсе быў затрыманы 34-гадовы грамадзянін Беларусі. Паводле звестак ведамства, Алег Шабалін з'яўляецца «актывістам радыкальнай прарасейскай структуры». Акрамя яго, затрыманыя тры супрацоўнікі прыватнай ахоўнай структуры, якія «праводзілі схаванае візуальнае назіранне за Куліковым Полем». На гэтым месцы 18 траўня падчас збору людзей яны збіраліся падарваць аўтамабіль.

Была распачатая крымінальная справа. Як паведамляла СБУ, падчас допыту Шабалін прызнаўся ва ўдзеле ў масавых беспарадках у Адэсе 2 траўня. Ён таксама прызнаўся, што меў намер за фінансавае ўзнагароджанне, атрыманае ад лідараў прарасейскіх сіл, стварыць групу наймітаў для правакацый у Луганскай вобласці з мэтай зрыву выбараў. З іх слоў, затрыманы праз пасярэднікаў усталяваў кантакт і падтрымліваў сувязь з паўстанцамі не толькі для выезду ў Луганск, але і для забеспячэння ўмоў знаходжання паўстанцаў у Адэсе для дэстабілізацыі сітуацыі ў рэгіёне.

5 чэрвеня МЗС Беларусі, якое на працягу двух тыдняў займалася высвятленнем лёсу Шабаліна, паведаміла, што ён знаходзіцца на волі ў якасці сведкі.