Выкладчыцу пасадзілі на 3 гады за падарункі ад студэнтаў

Суд Рэчыцкага раёна вынес абвінаваўчы прысуд педагогу мясцовага аграрнага каледжа за дробную карупцыю.

Выкладчыца дысцыпліны «Свінагадоўля» атрымала тры гады пазбаўлення волі ў папраўчай калоніі за тое, што захапілася падарункамі ад удзячных студэнтаў-завочнікаў, піша «Советская Белоруссия».

Мяркуючы з матэрыялах абвінавачвання, для шмат якіх студэнтаў завочнага курса дапусканне да іспыту ў дысцыпліне і яго здача суправаджаліся рэгулярнымі невялічкімі гасцінцамі. Прычым часцяком з ініцыятывы самой выкладчыцы. Напрыклад, адной навучэнцы яна прапанавала перапісаць кантрольную работу, за што чакала на знак падзякі адно дзве рамкі для фатаграфій. Маладзёну напярэдадні здачы сэсіі замест экзаменацыйных пытанняў было прапанавана прынесці бляшанку фарбы, а двум іншым студэнтам - купіць у канкрэтнай краме вазоны.

У раённай пракуратуры, якая падтрымлівала абвінавачванне, дадаюць драбніцы: «Потым быў імпартны стацыянарны тэлефон, збор за паўмільёна рублёў педагогу на куплю сушылкі для бялізны...»

Паводле матэрыялаў крымінальнай справы выкладчыца абвінавачвалася ў службовай фальсіфікацыі і атрыманні хабару, у тым ліку паўторна. Сваёй віны яна не прызнала. Суд першай інстанцыі прысудзіў яе да трох гадоў пазбаўлення волі ў калоніі агульнага рэжыму з канфіскацыяй чвэрці маёмасці і пазбаўленнем права займацца педагагічнай дзейнасцю на працягу трох гадоў.