Лукашэнка ў Гародні: велізарны картэж і «зачыстка» цэнтра горада (Відэа)
177- 14.11.2014, 14:43
- 153,915
Гарадзенцы абмяркоўваюць меры бяспекі, прынятыя ў сувязі з візітам дыктатара.
14 лістапада Аляксандр Лукашэнка ў рамках рабочай паездкі наведвае Гародню. «Салідарнасць» сабрала некалькі выказванняў жыхароў горада, размешчаных на «Гарадзенскім Форуме».
«Правадыр баіцца ўласнага народа»
Першыя паведамленні з'явіліся 13 лістапада:
- Сёння быў праезд ці то групы суправаджэння, ці то аховы. З крыкамі ў мацюгальнікі «Стаяць!», «Кіроўца аўтобуса, пасажыраў не выпускаць!» і з рэгуліроўшчыкам на скрыжаваннях. З перапуду нават хацела пешшу ісці дадому. Агародамі, ага.
- Прыязджае заўтра, а ў цэнтры ўжо на кожным кроку ДПС.
- Паказуха нават у тым, што ў закінутай вайсковай частцы (па Касманаўтаў) з 8 раніцы да вечара бульдозер і экскаватар расчышчалі завалы (разбураны ангар) - хоць да гэтага нікому не было справы. Шкада, што не здагадаліся траву ўздоўж абочыны зялёнай фарбай падфарбаваць - успомніў бы 80-я.
- Правадыр баіцца ўласнага народа. Што там. Стрэльбы паляўнічыя ўжо ва ўсёй Гародні сабралі, напэўна.
- У шэсць вечара прыйшоў дадому і... падвалы (дзе захоўваецца садавіна-агародніна) апячатаныя. Пячатка стаіць Кастрычніцкага РАУС. Няўжо перад прыездам «усенароднаабранага» трэба ладзіць такі «цырк». Трэба рыхтавацца ў чацвер да «добраахвотна-прымусовай» эвакуацыі транспарту па Касманаўтаў.
- А гарышчы, напэўна, таксама. Гэта метады спецслужбаў (яшчэ з часоў СССР, а можа і раней) пры прыездзе першых асоб - такія мерапрыемствы праводзілі на ўсіх дамах, якія стаяць уздоўж дарогі. Праўда, тады праводзілі пры прыездзе замежных кіраўнікоў. А цяпер часы, мабыць, іншыя.
- Міліцыя і ДАІ катаюцца па начным горадзе, і патрулі зазіраюць у розныя месцы.
- Як і меркаваў - а 22.45 патэлефанавалі з ДАІ і папрасілі прыбраць аўтамабіль, які стаіць у належным месцы. Па Касманаўтаў ужо ўсё зачышчаюць.
Раніцай 14 лістапада з’явіліся новыя сведчанні:
- Бачыў сёння раніцай шмат людзей у цывільным з рацыямі па шляху руху на працу. Народная любоў, яна такая.
- Выехаў раніцай крыху раней на працу. А 07:05 ужо стаяла машына на стаянцы, 07:15/07:20 ужо ішоў цэлы натоўп ДПС-нікаў па вуліцы Белуша ў кірунку Скідзельскага рынку.
- Ды ўсё зачышчаюць. У кожным двары на Белуша-Лідскай-Касманаўтаў паставыя ДПС, на кожным прыпынку, на выездах з маленькіх вулачак яны ж. У мяне перад заводзікам ніводнай машынкі. На ўездзе/выездзе на мыйку зноў жа паставыя ДПС.
Адзін з наведвальнікаў форуму заклікаў крытыкаў:
- Дзень пацярпіце, не ныйце.
Гарадзенскі рэсурс 015.by 14 лістапада вядзе онлайн-рэпартаж пра візіт Лукашэнкі ў Гародню.
Сайт паведамляе аб перакрытых вуліцах горада і альтэрнатыўных маршрутах руху транспарту.
- Рух на пл. Леніна спынены. У радыусе 500 метраў ад аблвыканкама забаронены ўсякі рух людзей і машын. Усіх мінакоў накіроўваюць вакольным шляхам праз парк або гарвыканкам, паведамляе падрабязнасці рэсурс.