Жаночы бунт у Баранавічах

На Баранавіцкай швейнай фабрыцы больш за 10 дзён не выплачваюць заробак.

Як паведамляе intex-press.by, раніцай 31 кастрычніцкай швачкі прадпрыемства сабраліся ля кабінета галоўнага інжынера, каб даведацца, калі яны атрымаюць свой заробак. Са слоў работніц, на гэтым тыдні яны амаль штодня патрабавалі грошы.

- У нас ужо пеня за квартплату пайшла, хто яе аплоціць? Нам трэба і крэдыты аплаціць, і за дзіцячыя садкі, за школу, а грошай нават на праезд няма! - абураюцца швачкі.

Галоўны інжынер Валянціна Тамашчук просіць работніц супакоіцца і разысціся па сваіх працоўных месцах.

- Калі вы хочаце адзін з адным пагаварыць, то рабіце гэта на перапынку. Я раю дарабіць да канца змены. У панядзелак вы таксама павінны быць на працоўных месцах, каб не было прагулу. Нявыплата заробку не будзе падставай для таго, каб не залічыць прагул. Як толькі грошы паступяць, вы даведаецеся пра гэта першымі, - кажа Валянціна Тамашчук.

Цяпер яна выконвае абавязкі дырэктара. Былы кіраўнік Дыяна Брашышкене сышла тыдзень таму, 24 кастрычніка.

- Звольнілася на ўзаемную згоду з інвестарам, - не ўдаючыся ў падрабязнасці, распавядае «IP» Валянціна Тамашчук.

Са слоў швачак, былы дырэктар у апошні дзень сваёй працы прайшлася па цэхах і паабяцала, што грошы будуць.

- Яна паўсміхалася, сказала, што грошы дадуць, а сама спакойна звольнілася і з'ехала. Нам кожны дзень абяцалі, што заробак будзе, а ўжо месяц заканчваецца, - абураюцца работніцы фабрыкі.

Незадаволеныя швачкі ў разгубленасці: працаваць без грошай яны не хочуць, але ў той жа час баяцца, што калі будуць страйкаваць, і зусім застануцца без працы.

Са слоў Тамашчук, заробак затрымалі праз пакупку новага абсталявання - спецыяльных пральных установак.

- Пакуль ўзгаднялі, усталёўвалі новае абсталяванне, спатрэбілася больш часу, чым думалі. Атрымліваецца, мы шылі рэчы, але не маглі сціраць іх перад адгрузкай, прадукцыя затрымлівалася, грошай не было. Гэта доўжылася са жніўня, першыя партыі адгрузілі толькі 28 кастрычніка, - распавяла галоўны інжынер.

Праз цяжкую сітуацыю прадпрыемства ўзяло ў пазыку ў інвестара 1,5 млрд руб (столькі трэба для выплаты заробкаў), але, са слоў Валянціны Тамашчук, і там узніклі праблемы з дакументацыяй па перакладзе грошай.

- У гэтай сітуацыі сказаць, што людзі не маюць рацыю - нельга! Але і мы нічога не можам зрабіць, - сказала Тамашчук.

На момант публікацыі матэрыялу стала вядома, што заробак працаўнікам швейнай фабрыкі налічылі ў другой палове дня 31 кастрычніка. Нягледзячы на гэта, швачкі прадпрыемствы маюць намер пісаць скаргу ў Інспекцыю працы і пракуратуру.

- Дырэктар сышла - і заробак сышоў. Мы не разумеем, чым займаецца кіраўніцтва, і хто нам плаціць, швейная фабрыка ці расейскі інвестар, на якога ўсе звальваюць віну і кажуць, што Расея грошай не дае. Ва ўсім гэтым трэба разабрацца, - кажуць працаўнікі прадпрыемства.

Звязацца з інвестарам «IP» не ўдалося.