Самасуд ў Вяснянцы: жыхары пакаралі нядбайных паркоўшчыкаў

Цэгла або смецце на капоце, - такія пакаранні прадугледжаныя для аўтамабіляў, якія займаюць пешаходную дарожку ў менскім мікрараёне Вяснянка.

Пакуль адны цішком праклінаюць аўтаўладальнікаў, якія ставяць машыны на зялёную зону, а іншыя нястомна выклікаюць інспектараў ДАІ, каб тыя аштрафавалі парушальнікаў, жыхары Вяснянкі ладзяць над жалезнымі конямі самасуд, піша агенцтва «Менск-навіны».

На зялёнай зоне ўздоўж дваровага праезду паміж дамамі № 01/12 і 4/1 на вуліцы Лесі Украінкі машыны звычайна стаяць шчыльнай шарэнгай, нягледзячы на тое што ў пачатку і канцы вуліцы размешчаны ахоўныя стаянкі, да кожнай з якой - 5 хвілін хады.

Хтосьці з жыхароў навакольных дамоў панадзіўся караць кіроўцаў, якія ігнаруюць правілы паркоўкі. Амаль кожны дзень сярод аўто, прыпаркаваных на месцы, дзе калісьці быў газон, можна сустрэць некалькі, у чый вобраз дадалі рыску ў выглядзе цэглы або сапрэлай драўніны на капоце, пустой пластыкавай тары на антэне, пяску на даху або галінак, якія тырчаць з бампера. Як народныя мсціўцы прымаюць пастановы, на якога з жалезных коней выплюхнуць свой праведны гнеў, зразумець на першы погляд складана.

Але мясцовыя жыхары патлумачылі прынцып, па якім выбіраецца ахвяра. Высвятляецца, барацьба тут ідзе не супраць паркоўкі на зялёнай зоне, а супраць канкрэтных аўто, якія адважыліся стаць на тую яе частку, дзе праходзіць амаль непрыкметная пешаходная дарожка.

У чымсьці гнеў зразумелы: ідзеш сабе па дарожцы і раптам натыкаешся на машыну, якую асабліва і не абысці, бо вакол яе амаль у непрыстойнай блізкасці стаяць суседнія «ластаўкі».

- Самому яшчэ можна праціснуцца неяк, але ж у раёне жывуць маладыя мамы, якія перасоўваюцца з каляскамі, - выказала абурэнне ў адрас акупантаў дарожак, адна з мясцовых жыхарак. - І што ім рабіць: аб'язджаць ўвесь шэраг машын па зялёнай зоне?

Хтосьці падтрымае неабыякавых жыхароў, хтосьці асудзіць такія ўчынкі. Аднак у любым выпадку спробы правучыць аўтамабілістаў выглядаюць ужо вельмі падобнымі на дробнае хуліганства, за якое ў нашай краіне прадугледжанае пакаранне.