Джон Кэры: Расея выходзіць за рамкі менскіх дамоўленасцей
4- 2.11.2014, 15:31
- 8,510
Заявы Расеі аб падтрымцы сепаратысцкіх «выбараў» у Данбасе выходзяць за межы дасягнутых у верасні пагадненняў.
Пра гэта дзяржсакратар ЗША Джон Кэры заявіў у інтэрв'ю тэлеканалу Bloomberg, паведамляе Цензор.нет са спасылкай на сайт замежнапалітычнага ведамства. «Мы б не разглядалі іх (псеўдавыбары) як легітымныя, яны могуць стаць праблемай», - адзначыў Кэры. Кіраўнік амерыканскага замежнапалітычнага ведамства адобрыў заключэнне газавых дамоўленасцяў паміж Кіевам і Масквой, «некаторыя сведчанні аб адводзе войскаў і зніжэнне ўзроўню гвалту», але гэтыя сігналы, на ягоную думку, вельмі нявызначаны. «Гэтага недастаткова, каб каго-небудзь задаволіць, мы занепакоеныя», - сказаў Кэры.
Ён таксама мяркуе, што ўведзеныя краінамі Захаду санкцыі «маюць глыбокі ўплыў на расейскі бюджэт і эканоміку», і Расея перажывае «сур'ёзныя праблемы». Украіна, на думку дзяржсакратара ЗША, можа мець адначасова «магутныя» стасункі і з Расеяй, і з Еўропай і стаць «мостам паміж імі». «Але прэзідэнт Пуцін сапраўды павінен пастанавіць, што ён хоча паважаць суверэнныя правы народа Украіны і працаваць з намі ў канструктыўным рэчышчы», - адзначыў Джон Кэры.
У кантраляваных прарасейскімі сепаратыстамі частках украінскага Данбаса 2 лістапада вядзецца галасаванне на так званых «выбарах». Украінская ўлада, Злучаныя Штаты, Еўрапейскі звяз і іншыя заходнія краіны, генеральны сакратар ААН Пан Гі Мун адзначылі, што гэтыя «выбары» нелегітымныя і не будуць прызнаныя. Расейскія афіцыйныя асобы тым часам заяўляюць пра намер прызнаць вынікі галасавання.